1 Tayta Diosta agradësicuy-llapa amatar alli cashanpita.
2 Tayta Dios salbashan cajcuna willacuy
3 llapan nasyuncunapita allpapa juc cantunpita jucaj cantuncama shuntashushayquita.
4 Waquenga paycuna chunyaj chaqui jirca agush-agush allpapa pantacasha purircaycaran
5 Yargaypita, yacunaypita wañunanpäna carcaycaran.
6 Chayno llaquicurnami Tayta Diosta mañacuran.
7 Nircur alli nänita tarichiran
8 Chaymi Tayta Diostaga agradësicuy cuyapäcoj cashanpita,
9 Paymi yacunaycajtapis yacuta tarichin.
10 Waquenga paycuna llaquisha carcaycaran.
11 Paycunaga Tayta Dios willapashanta manami wiyacushachu caran.
12 Chaymi Tayta Diosga fiyupa ñacay aruycunaman churaran.
13 Chayno llaquicuycho car-rämi Tayta Diosta mañacuran.
14 Paycunataga llaquisha caycajta jorguran.
15 Chaymi Tayta Diostaga agradësicuy cuyapäcoj cashanpita,
16 Paymi acapa-acapa rurariran runsi puncucunatapis.
17 Paycuna waquenga juchanpita
18 Llapan micuytanami melanaran.
19 Chayno llaquicuycho carnami Tayta Diosta mañacuran.
20 Allchacächiyta munallarmi allchacächiran.
21 Chaymi Tayta Diostaga agradësicuy cuyapäcoj cashanpita,
22 Tayta Diosta agradësicushpayqui uywacunata pishtay.
23 Paycuna waquenga büquicunata rantiran.
24 Lamar chaupichöna caycashpan ricaran
25 Tayta Dios rimarcuptin fiyu wayra gallaycuran.
26 Chaymi yacuga büquicunata syëlucama jitariran.
27 Chay runacuna machashano tapra-tapra carcaycaran.
28 Chayno llaquicuycho carnami Tayta Diosta mañacuran.
29 Löcu wayratapis wall-wallyaycajllaman Tayta Diosga ticrachiran.
30 Yacu mana cuyucuptinna paycunaga cushicuran.
31 Chaymi Tayta Diostaga agradësicuy cuyapäcoj cashanpita,
32 Shuntacaycur llapaniqui alabay.
33 Tayta Diosmi ticrarachin mayucunata,
34 Alli chacracunatapis agushman ticrachin
35 Ichanga chunyaj chaqui jircatana ticrachin gochaman,
36 Chayman tiyachin yargaycajcunata.
37 Chacracho arur übasta lantan.
38 Tayta Dios bindisyunta gon runacuna aypallaman mirananpaj.
39 Ñacaptin, mana allicuna chayaptin, gueshyawan wañuptin, wallcayaptin
40 ñacachejcunata Tayta Diosga manacajman churar castigan.
41 Pobricuna llaquicurcaycajtami ichanga Tayta Dios alliman churan.
42 Chayta ricar, alli runacunaga cushicun.
43 ¿Piraj yarpaysapa yachajcuna?