1 Sohp pwurehng tapihada koasoi
2 I ahpw men ei mour en pwuralahng mahs,
3 Koht ketiket rehi ahnsowo
4 Iei ni rahn pwuko me I paiamwahu
5 Koht Wasa Lapalahpie ketin ieiang ie ahnsowo
6 Ei tungoal kou oh kuht kan kihda milik laud,
7 Ni ahnsou me mah kan kin tuhpene nan kahnimwo,
8 mwahnakapw akan kin keisang mwohi ni ar kin kilang ie,
9 Kaunen aramas ako pahn kin tokedihsang ar koasoi;
10 pil me keieu lapalap ako kin nennenla.
11 Koaros me kilang oh rong duwen ngehi
12 Ni ahnsou me semwehmwe kan peki sawas, I sewese irail;
13 Aramas akan me mihla nan apwal mwuledek, kapinga ie,
14 I wia mwekid pwung oh pahrek ahnsou koaros.
15 Ngehi me wia mesen me maskun kan,
16 I rasehng sahm emen rehn me semwehmwe kan
17 I kauwehla manaman en aramas lemei kan
18 I kasik me ei mour pahn reirei
19 I rasehng tuhke pwoat me kalowe kan kin kelemwur ahnsou koaros,
20 Aramas koaros kin kapikapinga ie ahnsou koaros,
21 Ni ei kihda kaweid, aramas akan kin nennenla
22 re sohte kin kapatahiong mehkot ni ei kin kaimwisekala ei pato kan.
23 koaros kin pwungki ei pato kan
24 I kin sirei ong irail ni eh kin sohla ar koapworopwor;
25 I kin ale pwukoa oh koasoanehdi wie lamalam akan;