1 ኤራ ቃማፓ ሱባ የሱሳ ቅፍርናሆመ ማቂ፥ ኬ የነ ጋዘ ዎረ ስንትዳ።
2 አሱንና ኬታ ኤካንጽ እጽን፥ መለ አቶ የዝን ባልታን ኡንኦደ ዎንስ ጋማ አሱን ሺቅን፥ የሱሳ ቃላ ታማርሳነ።
3 ኦይዲ አሱን ፈቲ ዎቦ አ ቶኪ ኤጎ ክእዳ።
4 አሱን ጋንግደ ግሾ አ የሱሳጎ ሺሾደስ ኡንትስ ዳንዳእንታንጽ እጽን፥ የሱሳ የዘ ዛላራ ኬ ኣፍቶ ቶኪ አ ኤ ዎይእደ አልግዘራ ሱለ ኬ የሱሳ ቲንተ ጋድዳ።
5 የሱሳ ኡን አማንቶ ብእ፥ የ ዎቦ አ፥ «ታ ናአዮ፥ ነ ናጋርታ አቶ ጋእንትዳ» ያጋይዳ።
6 ህገ አስታማሩንፓ ይና በስተ በትደ ፈተ ፈተ ፋ ዎዝንተ፥
7 «ናተ Ꮉይ አ Ꮉኒ ጋር ኢታ ባዝ ጾዛላ አኮስ ኦሄ? ጾዛ ጻላላፕ አትን መለ ኦደ ናጋራ አቶ ጋኦደስ ዳንዳእዘ?» ጋእ ቆፕዳ።
8 ኡንቲ ፋ ዎዝንተ ይኒ ጋራ ቆፕዳኖ የሱሳ ኢራ ፋ አያንተ ኤሪ፥ ኡንታጎ፥ «ይንቲ ይን ዎዝንተ አኮስ Ꮉንጋራ ቆፐተ?
9 ዎቦ አ፥ ‹ነ ናጋርታ አቶ ጋእንትዳ› ጋዛና ኡኬነ? ዎይ፥ ‹ደንዲ ኤቂ ነ አልግዛ ቶኪ ቅቶ› ጋዛና ኡከ?
10 የዝን ታስ፥ አስ ናአይስ፥ ሳአላ አፋ ናጋራ አቶ ጋኦደስ አደት ዎልቃ የዛኖ ይን ኤሮደ ጋር» ጋእ የ ዎቦ አ፥
11 «ነና ጋነ፥ ደንዲ ኤቂ ነ አልግዛ ቶኪ ነ ካራ ቅቶ» ያጋይዳ።
12 አ ኤልሲ ደንዲ ኤቂ፥ ፋ አልግዛ ቶኪ አስ ኡባ በእዝን ቅትዳ። አሱን ኡባ ጋማ ቆፒ፥ «ኑኒ Ꮉኒ ጋር ጋማ ቆፍዘ ባዝ ብእ ኤሮስ» ያጋእ ጾዝ ጋላትዳ።
13 የሱሳ ማህ ጋልላ አባ ጋጻ Ꮉንግ፥ ፋጎ ይእደ አሱንና ኡባ ታማርስዳ።
14 ኢራ አተራ፥ እልፍዮሳ ናአይ ሌወ ጋእንትዘ ቃራጠ ጋችዘ በስተ በትዳያ ብእ፥ «ታና ካሎ» ያጋይዳ። ሌዊዘ ደንዲ ኤቂ ኤዛ ካልዳ።
15 የሱሳ ካ ማደስ ሌዊ ኬ በትዳ። ኤዛ ካልዘ አሱን ጋማ ማቅደ ግሾ ቃራጠ ጋችዘ ጋማ አሱንን ናጋራንቹን ኤራን ኤ ታማሩንራ ዎላ በትዳ።
16 ህገ አስታማረ ማቅደ ፈቲ ፈቲ ፋርሳዉን የሱሳ ናጋራንቹንራን ቃራጠ ጋችዙንራ ካ ማአደራ ብእ፥ «ኤ አኮስ ናጋራንቹንራን ቃራጠ ጋችዙንራ ካ መኤ?» ያጋእ፥ ኤ ታማሩንና ኦጭዳ።
17 የሱሳ ኡን ጋዛኖ ስእ፥ «Ꮉርግንትዘስ ፋትን ፋጻስ አክመ ኮሾስ። ታኒ ናጋራንቹንና ጼጎደስ ዪዳፕ አትን ጽሉንና ጼጎደስ ይእካያ» ያጋእ ኡንትስ ማህዳ።
18 ጻማቅዘ ዋሐንሳ ታማሩንን ፋርሳዉን ጾማነ። ፈቲ ፈቲ አሱን የሱሳጎ ይእ፥ «ዋሐንሳ ታማሩንን ፋርሳዉን ታማሩን ጾማነ፥ የዝን ነ ታማሩን አኮስ ጾሞሶ?» ያጋይዳ።
19 የሱሳ ኡንታጎ፥ «ሳርገ ይእደ አሱን ማቾ ኤክዘ ኡንታራ የዝን፥ ጾሞደስ ዳንዳአነ? ማቾ ኤክዘ ኡንታራ የዝን፥ ጾሞደስ ዳንዳኦስ።
20 የዝን ማቾ ኤክዘ ኡን ካለፓ ኤክንቶደስ ዎደ የኦዳ፥ ኡን የ ዎደ ጾሞዳ።
21 «ጋልአ ማኦላ ክለ ጫርቀ ጋዲ ስክዘ አስ ባያ። ጋዲ ስክኮን፥ ክልዘ ጋልአ ማእዛ ፌነ፤ ፌዽታን ካሰንፓ አነ።
22 ማህ ማልአንቶ ዎይነ ጋልአ ስልጰ ጉጅዘ አስ ባያ። ማህ ጉጅኮን፥ የ ዎይንዘ ስልጵዛ ፌነ፥ ፋስን ላንታነ፥ ስልጵዘን ኢታነ። የዝን ማልአንቶ ዎይነ ክለ ስልጰ ጉጅንታነ» ያጋይዳ።
23 የሱሳ ፈቲ ሳምባታ ቃማ ባንጋ ጋደ ግዳራ አደራ፥ ኤ ታማሩን ኤራ Ꮉንግተራ ባንጋ ትዣ ሽጪ አነ።
24 ፋርሳዉን የሱሳጎ፥ «ይኬ፥ ነ ታማሩን ሳምባታ ቃማ ዎጋ ባይዘ ባዝ አኮስ ኦቼ?» ያጋይዳ።
25 የሱሳ ኡንታጎ፥ «ዳዉተ ናይ፥ ሙእዘ ባዝ ኮይደ ዎደ ፋራ የዙንራ ኦችዳኖ ነ ናባብካ?
26 አብያታር ካህኑን Ꮉላቃ ማቂ የዘ ዎደ ዳዉተ ጾዘ ኬ ገሊ፥ ካህኑን ጻላላ ማአደፕ አትን ኦደን ማአደስ ዎጋ ባይዛኖ ላ ቲኖ ጋድደ ዳቡቶ ሙእዳ፥ ፋራ የዙንስን እንግዳ» ያጋይዳ።
27 ማህን የሱሳ ኡንታጎ፥ «ሳምባታ አስ ናአ ማደስ ጋእ መንትዳፕ አትን አስ ሳምባታስ መንትካያ።
28 ይኒ ግሾ፥ አስ ናአይ፥ መለ አቶ የዝን ሳምባታስን ላ» ያጋይዳ።