1 Omuhasi omugesi gemeeresaŋo amago gage
2 Oyo agendera mu magira amaluŋamu atya Musengwa
3 Endoma yʼomuŋubeebe yimuleetera ohumuhubba
4 Aŋaŋuma esaame ohulima eŋuma ehiba mu hyagi
5 Omujulizi owʼamazima sadulinga
6 Omuutu omunyoomi nʼolu gendula amagesi sagasuna
7 Yeŋale omuŋubeebe olwohuba ŋaŋuma ehyʼamagesi ehi oja hwega.
8 Omugesi ategeera ehyʼohuhola olwohuba mugesi
9 Abaŋubeebe bahola ehibi era ndibafeyo
10 Omuutu omwene njʼamanya enaku oba esangaalo ebiba hu mwoyo gugwe
11 Amago gʼomuhosi wʼebibi gaja hufuuha gunda
12 Ŋaliŋo ekola yʼebiitu eyiboneha ohuba endaŋi eyiri omuutu
13 Enjeho jisobola ohuŋwamo enaku
14 Omuutu omubi mu mwoyo alisuna ehimusaanira
15 Omuŋubeebe afugiirira hiisi hiitu
16 Omuutu omugesi atya ohugwa mu bigosi era geŋala ohuhola ebibi
17 Abaatu abatalwa hunyiiga bahola ebyʼobuŋubeebe
18 Abaŋubeebe bagendera mu buŋubeebe
19 Abahola ebibi balihubbira abalaŋi amafuha
20 Eŋuma owenda omugadi era wayire muliranwawe samwenda
21 Hiba hibi omuutu ohunyooma muliranwawe
22 Abo abahola ebibi baŋaba
23 Ohuhola emirimo nʼamaani hireeta amagoba
24 Obuŋinda wʼabagesi njʼeŋono lyawe
25 Omujulizi aloma amazima aŋonia obulamu wʼabaatu
26 Oyo atya Musengwa aba nʼaŋohweŋogoma
27 Ohutya Musengwa hiri oti sulo eyireeta obulamu,
28 Obungi wʼabaatu njʼeŋono lya habaha
29 Omuutu omugumikiriza aba mutegeefu
30 Omwoyo ogwijuuye emiyaaya guleetera omubiri ohuba mu mbeera endaŋi
31 Anyigirisa abagadi aba anyooma Oyo Owabatonda
32 Abahosi bʼebibi bereetaho ebigosi olwʼebi bahola
33 Hiisi hiŋeego hyʼomuutu omugesi hiba hyʼabutegeefu
34 Abaatu banaba bagwalaafu ehyo hiŋeesa egwanga lyawe eŋono
35 Omuŋeeresa omulaŋi asangaasa habaha