1 Aude lodo gaiaa ange gi de gau baubau,
2 go hiidinga gilaadeu e hagatau de hai e vaivai hai ai dangada,
3 De hale e hagaduu i de heiangi,
4 gai go de iloo mee e hhao ai ga hoohonu ono aabi
5 Tangada heiangi e mmahi mmao,
6 Denga muna bale danuaa e maua i de dagi goe i de hebagi,
7 De heiangi e hano laa honga de biho o tangada lodo senga;
8 Tangada e haia denga hagatau baubau
9 Hagatau a tangada lodo senga e haisala,
10 Noo koe e dee lodo mmahi i de masavaa hai ngadaa,
11 Hagaola ina gilaadeu gu kave laa e daa gi maakau;
12 Noo koe e hagadaba, “Tilo, gimaadeu tee iloo donu,”
13 Dagu dama, gaina denga hooni, go hiidinga e danuaa,
14 Koe gi iloo hogi bolo de heiangi e bei de mee maimai ange gi doo hagasaalunga;
15 Tangada baubau, aude noho gi daalia e hai baasi ange gi tangada heohi,
16 gai ga baguu naa donu tangada heohi i e hidu hanonga, gai ia e hidi age ange naa,
17 Aude malangilangi i de masavaa o doo hagadaumee e baguu ai,
18 kana gidee naa e Tagi Maolunga, gai ia gu dee malangilangi,
19 Aude manavasaa i hiidinga o olaadeu e haia de baubau,
20 go hiidinga tangada baubau e dee daulooloa donu dono mouli,
21 Dagu dama, koe gi madagu i Tagi Maolunga ma de hodooligi,
22 go hiidinga e daa hagalele naa donu delaau oha mee nei,
23 Aanei ange hanu muna a de gau heiangi.
24 Be goai e hai ange gi tangada gu haisala, “Koe e dee haisala” —
25 Aagai dangada e hagaseegina tangada gu haisala,
26 Tangada e daalaa adu de muna abodonu
27 Haia gi lava au hegau i duaahaho ma de hagadabena au veelenga;
28 Aude hagabaubau ina tangada e baa adu gi de goe i teai hiidinga,
29 Aude hagadaba, “Au e hai ange naa gi de ia ana mee ne hai mai gi de au;
30 Au ne hano laa gaogao de veelenga a tangada vaiduu,
31 gai tilo, gu ssomo ai denga manu daladala ma manu dabeo,
32 De masavaa aagu ne gidee ai ma de maanadu dagodo o de mee nei,
33 de damaa seni iho, ma de damaa mmoe luoo mada,
34 gai de hagaau aloha e duu adu naa gi de goe bei tangada gaiaa,