1 De ingoo danuaa e hagamogomogo ange i goloa lagolago,
2 Tangada lava ma tangada hagaau aloha se dagodo daudahi i de mee nei:
3 Tangada maanetonu e mmuni i de masavaa aana e gidee ai de mee hagamanavasaa,
4 De hagaoanga o de lodo maolalo ma de madagu i Tagi Maolunga,
5 Haiava o tangada hadu muna iai manu daladala ma denga sele,
6 Hagaabo ina ange tama gi de haiava oona e hano ai,
7 Tangada lava e dagi de gau hagaau aloha,
8 Tangada e dooa de baubau e hagihagi naa de hai ngadaa,
9 Tangada abodonu e manuuia naa donu,
10 Haia gi hano gee tangada doo i mee, gai gu deai hogi se hebagi,
11 Tangada e lodo laa gi gilimalali ono lodo, gai ana muna e maamaane,
12 Luu mada o Tagi Maolunga e daumada tangada iloo mee,
13 Tangada vaiduu e hagadaba, “E dahi laiono i duaahaho!”
14 De ngudu o de hine dagodo haisala e bei de geelinga gelo,
15 De lodo senga e dagodo i lodo o de gauligi,
16 Be goai e vaivai haia tangada hagaau aloha gi kii ange ai dono lava,
17 Huli ange doo dalinga hagalaangona muna a de gau heiangi,
18 gai e hagamalangilangi dau daohi muna nei i oo lodo,
19 Au e agoago adu goe anailaa nei,
20 E aha, e dee e matolu muna heiangi aagu gu sisi adu gi de goe,
21 e agoago adu ai goe i de muna abodonu ma de heohi,
22 Aude gaiaadia mee o tangada hagaau aloha,
23 i hiidinga Tagi Maolunga e bale ange naa donu gilaadeu,
24 Aude hai soa ange gi tangada e moolau laa de lili,
25 aabe gi ago ange i ana dahulinga,
26 Koe gi dee se dangada e hagatoo donu e hagao muli a dahi dangada,
27 noo koe e dee maua i de hagao,
28 Aude hagangaalue ina denga goinga madagidagi,
29 Koe e gidee laa dahi dangada labagau i de hai ana hegau?