1 Tangada e vvae gee laa ia ma dangada, e maanadu donu huu ia,
2 Tangada lodo senga e dee malangilangi i de hai gi donu ange ia,
3 De masavaa naa huu e humai ai de baubau,
4 Muna a tangada e tala e bei de vai gelo,
5 E dee danuaa doo hagabuni ange gi tangada baubau,
6 Muna a tangada lodo senga e hai ga hebagi dangada,
7 Muna a tangada lodo senga e hagabaubau donu huu ia,
8 Muna a tangada hai samu e bei denga amuamu gai mammami,
9 Tangada vaiduu i de hai ana hegau,
10 De ingoo o Tagi Maolunga e bei de hale buibui makaga;
11 Goloa lagolago o de gau llava go delaadeu aduhale buibui;
12 De hagaodi o de lodo maolunga o tangada go de magau,
13 Tangada e basa laa i mua dana noho ga hagallongo,
14 Tangada e maua i de hagauda dono magi,
15 Tangada heiangi e lodo e hai gi maua e ia de iloo mee,
16 De ngadi gaavange e hhuge ange de haiava o tangada,
17 Tangada e daalaa dono heohi i mua, e dulagi be go ia e heohi,
18 De hai tada e hai gi dee hagadaumee dangada,
19 Tangada gu lili laa e makaga ange ono lodo i de aduhale buibui makaga,
20 Muna a tangada e aahe ange naa donu huu gi de ia;
21 Muna a tangada iai ssauaa o de mouli aama de magau,
22 Tangada e gidee laa dahi bodu moona gu gidee dahi mee danuaa,
23 Tangada hagaau aloha e dangidangi,
24 Tangada e soa laa ono soa, e duu ange naa donu gi de hai ngadaa,