1 De hine heiangi e hagaduu age dono hale,
2 Tangada e hai hegau laa i de mee abodonu e madagu i Tagi Maolunga,
3 Muna a tangada lodo senga e bei de laagau e hagailiili ai laa tua,
4 Noo e deai donu kaau, gai de mommee o denga manu gu ngadi dagodo;
5 Tangada tala hagadonu i de mee abodonu e dee hadu muna i de masavaa e hagamodu ai muna,
6 Tangada doo mee e ssala de heiangi, gai e dee gidee e ia,
7 Hagaui gee mai i tangada lodo senga,
8 Tangada maanetonu e heiangi i de hagasaele dono haiava e hano ai,
9 De gau llodo ssenga e hakadanga i de hagaheohi o haisala,
10 Tangada e donu iho gi dagodo de daemaha ono lodo,
11 De hale o tangada baubau e oha naa ga maoha,
12 E dahi haiava e dulagi be go de haiava heohi ange gi tangada,
13 Ga gadagada naa donu tangada, gai ono lodo e mmae donu,
14 Tangada e huli gee laa i de mee heohi e kave naa donu de hagaoanga o ana hegau,
15 Tangada senga e hagadonusia mee alodahi,
16 Tangada heiangi e madagu i Tagi Maolunga, ma de kino i de baubau,
17 Tangada e moolau laa de lili e hai hegau i de lodo senga,
18 De gau llodo ssenga e kave de lodo senga,
19 De gau baubau e ino naa gi lalo i mada i mua o de gau danuaa,
20 Dangada e paa ange gi tangada hagaau aloha e kino donu hogi i de ia,
21 Tangada e hagangadi mee ina tangada e baa ange gi de ia e haisala donu,
22 Dangada e haia hagatau baubau e haisala donu,
23 Hegau alodahi e hanu donu mee e maua ai,
24 De lava o de gau heiangi go de hau i honga olaadeu biho,
25 Tangada tala hagadonu i de muna abodonu e hagaola mouli o dangada,
26 Tangada e madagu laa i Tagi Maolunga e lodo mmahi,
27 De madagu i Tagi Maolunga go de vai o de mouli,
28 Dangada soa mmao go de mahamaha o de hodooligi,
29 Tangada e dee moolau laa de lili se dangada e laumalie dono donu,
30 De baba i lodo o tangada e hai ga mmahi de angaanga,
31 Tangada e vaivai haia laa tangada hagaau aloha e hagangadi mee de ia ne haia gilaau,
32 Tangada baubau e hagaduasala donu huu i ana hegau baubau,
33 De heiangi e dagodo i daho tangada e donu ange laa,
34 De mee heohi e hai ga maolunga dahi henua,
35 De hodooligi e malangilangi i tangada hai hegau heiangi,