1 NoTeco Dios catli nimitzhueyitlalía,
2 Pampa nopa tlajtlacolchijca masehualme nechejelnamiquij huan nechistlacahuíaj.
3 Inijuanti nechcualancaitaj huan nechyahualohuaj para nechilhuise camanali catli amo monequi.
4 Na niquinicnelía huan nimotlatlajtía para tiquintiochihuas.
5 Na niquinchihuilía catli cuali,
6 NoTeco, xiquintlali imaco se catli fiero.
7 Huan quema ya quintlajtolsencajtose, xijchihua para nochi quimatise para quihuicaj tlajtlacoli.
8 Nimitztlajtlanía para inemilis nocualancaitaca ma amo huejcahua ipan ni tlaltipactli.
9 Iconehua ma mocahuaca icnotzitzi huan isihua ma mocahua cahuali.
10 Iconehua ma monejnencaquixtica huan ma motlaejehuijtinemica.
11 Ma quitlamitlacuijcuilica catli quitlatlanejtiyayaj,
12 Amo aqui ma quipalehui ica niyon se tlamantli huan amo aqui ma quintlasojtla iconehua catli icnotzitzi.
13 Ma miquica nochi iconehua.
14 TOTECO, amo xiquelcahua nochi inintlajtlacolhua itatahua huan inanahua.
15 Ma mocahua inintlajtlacolhua moixpa, TOTECO,
16 Pampa inijuanti amo quinejque quipalehuise ininhuampox.
17 Quinpactiyaya quintelchihuase ininhuampox.
18 Nopa tlatelchihualistli tlahuel quinpactía pampa eltoc ipan nochi catli quichihuaj.
19 Huajca ama ipani ma huetzi nopa tlatelchihualistli,
20 Quej nopa, TOTECO, xiquintlaxtlahui nopa nocualancaitacahua catli nechistlacahuíaj,
21 Pero TOTECO, ta catli tinoTeco,
22 Na nitlaijiyohuía huan tlahuel monequi motlapalehuil,
23 Niyajtinemi para nimiquis huan nitlaijiyohuía quen se chapoli catli quitlahuiso se masehuali.
24 Notlancuaco ayacmo quipiya chicahualistli pampa tlahuel nimosajtoc.
25 Nochi masehualme ipan tlaltipactli nechhuetzquilíaj.
26 ¡TOTECO Dios, techpalehui!
27 Techmaquixti tlamiyacapa,
28 Huan teipa sintla nechtelchihuaj, amo tleno,
29 Ma mopinahualtica tlamiyacapa inijuanti catli nechistlacahuíaj.
30 Pero na tlatoctzitzi nijtlascamatis TOTECO,
31 Pampa yaya itztoc ininhuaya catli teicneltzitzi para quinmanahuis ininmaco inincualancaitacahua.