1 TOTECO, amo xinechtlaijiyohuilti quema ticualani.
2 Miyac nechcocohua tlen ax cuali nijchijtoc.
3 Huan pampa ticualani pampa nitlajtlacolchijtoc,
4 Nochi notlajtlacolhua nopan huetztoc.
5 Palani notlacayo pampa nijchijqui se huihuiyotl.
6 Nicuitlapanhuitoltic huan ax hueli nijtlalana notzonteco.
7 Nochi notlacayo tliquisa.
8 Nimomati queja nitlatejtetzontli.
9 NoTeco, ta tijmati queja nijnequi sampa niitztos cuali moixpa.
10 Noyolo nelhuihuipica,
11 Nonelhuampoyohua huan noteixmatcahua san nechhuejcaitaj, pampa quiijiyaj nococohua.
12 Inijuanti tlen quinequij nechmictise quisencahuaj tlaquetztli para nechmasiltise.
13 Pero na nimochihua queja ax nijcaqui tlen quiijtohuaj.
14 Quena, na nimochihua queja ax nijcaqui inintlajtol,
15 Pampa san ipan ta nimochiya, TOTECO, tinoDios.
16 San nimitztlajtlanía para amo xiquincahuili ma noca huetzcaca.
17 Nijmati nimiquis pampa tlacuajcualocayotl ax nechcahua niyon se tlalochtli.
18 TOTECO, nijnequi nimitzpannextilis nochi notlajtlacolhua,
19 Nocualancaitacahua momiyaquilijtoque huan moyoltetilijtoque.
20 Yonque tlen cuali niquinchihuilijtoc, nechcuepilijtoque ica tlen fiero.
21 NoTeco Dios, amo xinechcajtehua noselti.
22 ¡Toteco! Xihuala nimantzi xinechpalehuiqui, ta tinotemaquixtijca.