1 NoTeco Dios tlen nimitzhueyitlalía,
2 Pampa nopa tlajtlacolchijca tlacame nechijilnamiquij huan nechistlacahuíaj.
3 Inijuanti nechcocolíaj huan nechyahualohuaj para nechilhuise tlajtoli tlen ax monequi.
4 Na niquinicnelía huan nimomaijtohua para tiquintiochihuas.
5 Na niquinchihuilía tlen cuali,
6 NoTeco, xiquintlali imaco se tlen fiero.
7 Huan quema ya quintlajtolsencajtose, xijchihua para nochi quimatise para quihuicaj tlajtlacoli.
8 Nimitztlajtlanía para iyolis nocualancaitaca ma ax huejcahua ipan ni tlaltepactli.
9 Iconehua ma mocahuaca icnotzitzi huan isihua ma mocahua cahuali.
10 Iconehua ma monejnencaquixtica huan ma motlaejehuijtinemica.
11 Ma quitlamitlacuijcuilica tlen quitlatlanejtiyayaj,
12 Axaca ma quipalehui ica niyon se tlamantli huan axaca ma quintlasojtla iconehua tlen icnotzitzi.
13 Ma miquica nochi iconehua.
14 TOTECO, amo xiquilcahua nochi inintlajtlacolhua itatahua huan inanahua.
15 Ma mocahua inintlajtlacolhua moixtla, TOTECO,
16 Pampa inijuanti ax quinejque quipalehuise ininhuampo.
17 Quinpactiyaya quintelchihuase ininhuampo.
18 Nopa tlatelchihualistli tlahuel quinpactía pampa eltoc ipan nochi tlen quichihuaj.
19 Huajca ama ipani ma huetzi nopa tlatelchihualistli,
20 Queja nopa, TOTECO, xiquintlaxtlahui nopa nocualancaitacahua tlen nechistlacahuíaj,
21 Pero TOTECO, ta tlen tinoTeco,
22 Na nitlaijiyohuía huan tlahuel monequi motlapalehuil,
23 Niyajtinemi para nimiquis huan nitlaijiyohuía queja se chapoli tlen quimajcahua se tlacatl.
24 Notlancua ayoc quipiya chicahualistli pampa tlahuel nimosajtoc.
25 Nochi tlacame ipan tlaltepactli nechhuetzquilíaj.
26 ¡TOTECO Dios, xinechpalehui!
27 Xinechmaquixti tlamiyacapa,
28 Huan teipa intla nechtelchihuaj, ax quenijqui,
29 Ma mopinahualtica tlamiyacapa inijuanti tlen nechistlacahuíaj.
30 Pero na ajachica nijtlascamatis TOTECO,
31 Pampa yajaya itztoc ininhuaya tlen teicneltzitzi para quinmanahuis ininmaco inincualancaitacahua.