1 ¡Xijtlascamatica TOTECO pampa yajaya nelía cuali!
2 Nochi imojuanti tlen TOTECO inmechmanahuijtoc, xitepohuilica.
3 Yajaya quinsentilijtoc nochi nopa tlacame tlen itztoyaj campa hueli ipan tlaltepactli.
4 Sequin nentinenque ipan huactoc tlali,
5 Amictinemiyayaj huan mayantinemiyayaj,
6 Huajca quitzajtzilijque TOTECO para ma quinpalehui,
7 Quinyacanqui xitlahuac ipan se ojtli tlen temachtli.
8 Xijhueyimatica TOTECO pampa yajaya tlahuel tetlasojtla,
9 Pampa Toteco quitlamaca tlen teicneltzi huan mayantinemi.
10 Sequin inijuanti itztoyaj ipan tzintlayohuilotl ipan tlatzactli huan nechca para miquise.
11 Ya nopa ininpantic pampa inijuanti moyoltetilijque ica tlen TOTECO quinnahuatijtoya,
12 Yeca Toteco quincajqui ma tlaijiyohuica ipan nopa tequitl tlen tlahuel teticayo.
13 Huajca quema ayoc quimatiyayaj tlachque quichihuase ica nopa tlaijiyohuilistli,
14 Quinquixti ipan nopa tzintlayohuilotl huan quinmanahui para ax miquise.
15 Xijhueyimatica TOTECO pampa yajaya tlahuel tetlasojtla huan quichihua huejhueyi tlamantli tlen ica tlacame san quisentlachilíaj.
16 Pampa yajaya quitlapanqui nopa puertas tlen bronce ipan tlatzacme,
17 Sequin tlacame tlahuel mohualiquilijque tlaohuijcayotl,
18 Huan ipan nopa tlaijiyohuilistli ayoc mayanayayaj ipampa inincocolis huan pampa itztoyaj nechca para miquise.
19 Pero quema ayoc quimatiyayaj tlachque quichihuase ica nopa tlaijiyohuilistli,
20 Toteco camatqui huan mochicajque.
21 Xijhueyimatica TOTECO pampa yajaya tlahuel tetlasojtla huan quichihua huejhueyi tlamantli tlen nochi quisentlachilíaj.
22 Xijpaquilismacaca Toteco huan yajaya quiitas queja elisquía se tlacajcahualistli.
23 Nopa tlacame tlen nemij ica ininbarcos ipan hueyi atl,
24 nojquiya quiitztoque nopa yejyectzitzi tlamantli tlen TOTECO quichijtoc ipan atl.
25 Quiitztoque quema TOTECO camatqui huan quichijqui ma motlalana se ajacatl tlen chicahuac,
26 Nopa barcos motlalanayayaj huan sampa atzintla huetziyayaj.
27 Inijuanti huihuipicaque huan momimilojque queja ihuintini,
28 Huajca quema itztoyaj ipan tlaohuijcayotl,
29 Quema tlaahuetziyaya huan tlaajacayaya chicahuac,
30 Huan inijuanti pajque miyac quema quiitaque ya moquetzqui nopa atl.
31 Ma quihueyimatica TOTECO pampa yajaya tlahuel tetlasojtla,
32 Ma quipaquilismacaca Toteco tlamiyacapa iniixtla nochi tlacame huan iniixtla nopa huehue tlacame tlen tlayacanaj ipan nopa tlali.
33 Toteco quinhuatztoc miyac atemitl huan quinchijtoc queja huactoc tlali.
34 Nopa cuali tlali tlen tlahuel tlaeliltía quichijtoc ma ayoc tlaelilti.
35 Pero nojquiya nopa huactoc tlali campa ax tleno eli quichijqui ma tlaelilti.
36 Huan quinhuicac nopa tlacame tlen mayantinemiyayaj para ma itztoca nopano,
37 Nojquiya quichijqui para ma tocaca ipan mila,
38 TOTECO tlahuel quintiochijqui.
39 Teipa pejqui caxani ininmiyaca nopa tlacame,
40 Huan yajaya quinicnotlali nopa tlayacanani tlen mohueyimatiyayaj,
41 Pero yajaya quinmanahui nopa teicneltzitzi.
42 Ma quiitaca nochi tlen quichijtoc TOTECO nochi tlen nemij xitlahuac iixtla,
43 Tlacame tlen tlalnamiquini quimachilise nochi ni tlamantli tlen Toteco quichijtoc,