1 परमप्रभुयागु थ्व वचन जिथाय् वल,
2 “अय् सीमानिम्ह मनू, मागोग देशया गोग, मेशेक व तूबलयाम्ह मू शासकपाखे थःगु ख्वाः स्वय्काः वयागु विरोधय् अगमवाणी या।
3 अले वयात थथे धा, ‘परमप्रभु परमेश्वरं थथे धयादी – हे गोग, मेशेक व तूबलयाम्ह मू शासक, जि छंगु विरोधय् दु।
4 जिं छन्त फनक्क चाःहिकाः साला हये। छंगु म्हुतुइ जिं बल्छी तयाबी। जिं छन्त व छिमि फुक्क सेनायात अर्थात छिमि सलत व सलगइपिं, लडाइँया हतियार, तःधंगु चिधंगु ढाल व तरवार घानातःपिं छगू तःधंगु सेनायात जिं पित हये।
5 इपिंनापं फारस, कूश व पूतयापिं मनूत दइ। उपिं सकसिनं ढाल ज्वनातःगु दइ अले नँयागु तपुलि पुयातःगु दइ।
6 गोमेर नं थः फुक्क सेनानापं व उत्तरया तापाःगु देश बेथ तोगर्मा थः फुक्क सेनानापं वइ। छनापं यक्व देशयापिं मनूत दइ।
7 “‘तयार जु! छ व छनापं मिलय् जुइत मूंपिं फुक्क सेनायात तयार या अले छ इमि नायः जु।
8 तःन्हु लिपा लडाइँया लागि छिमित सःती। लिपाया दँय् लडाइँपाखें नाश जुयाः हाकनं दय्कूगु देशयात छिमिसं हमला याइ, गुगु देशयापिं मनूत यक्व जातितपाखें ताःई तक उजाड जुयाच्वंगु इस्राएलया पहाड पहाडय् मुंगु खः। इमित जाति जातितपाखें हःगु खः, आः इपिं फुक्क याउँक च्वनाच्वंगु दु।
9 छ ला फय् थें हथासं न्ह्यांवनी, छ व छंगु फुक्क सेना, अले छनापं दुपिं यक्व जाति जातित सुपाँय् थें च्वय् थाहां वनी। छ देशयात त्वपुइगु सुपाँय् थें जुइ।
10 “‘परमप्रभु परमेश्वरं थथे धयादी – उखुन्हु छुं बिचाःत छंगु नुगलय् वइ, अले छं छगू मभिंगु ग्वसाः ग्वइ।
11 छं थथे धाइ, “पःखाः मदुगु गांत दुगु देशयात जिं हमला याये। पःखाःत, मू ध्वाखा व गजबार मदय्क शहरय् याउँक च्वनाच्वंपिं व शंका मयाइपिं जातियात जिं हमला याये।
12 उपिं ध्वस्त जूगु थासय् आः हाकनं जाति जातितपाखें मूंपिं मनूत, सा द्वहं व मेगु सम्पत्ति तयाः देशया मू थासय् हे छेँ दय्काः च्वनाच्वंगु दु। उपिं बस्तीत व मनूतय्त लुतय् यानाः जिं भज्यंक नाश यानाबी।”
13 शेबा व ददानयापिं मनूत, तर्शीशयापिं व्यापारीत व लिक्क लिक्क च्वंगु गांयापिं मनूतय्सं वयाः छन्त धाइ, “छु! छ लुतय् यायेत वयागु ला? छु! धन-सम्पत्ति लाकाकायेत, लुँ वहः यंकेत, सा द्वहं व मालसामान यंकेत, थिकय् थिकय्गु लुटया सामान मुंकेत छं सेनायात मुंकागु खः ला?”’
14 “उकिं अय् सीमानिम्ह मनू, अगमवाणी ल्हानाः गोगयात धा, ‘परमप्रभु परमेश्वरं थथे धयादी – गुगु इलय् जिगु प्रजा याउँक च्वनाच्वनी उगु इलय् छं थ्व खँ मसी ला?
15 छ उत्तर पाखेया तातापाःगु छिमिगु थासं वइ। छ व छनापं सल गयाः यक्व जातियापिं मनूत वइ, अर्थात छगू तःधंगु सेना व छगू बल्लाःगु सेना।
16 गथे सुपाँचं जमिनयात त्वपुइ, अथे हे छं जिगु जाति इस्राएलया देशय् हमला याइ। उकिं हे गोग, लिपा वइगु इलय् जिं थःत छपाखें इमिगु मिखाया न्ह्यःने पवित्र क्यनीबलय् जातितय्सं जितः सीमा धकाः जिं छन्त जिगु देशया विरोधय् हये।
17 “‘परमप्रभु परमेश्वरं थथे धयादी – पुलांगु इलय् जिं थः दासत, इस्राएलया अगमवक्तातपाखें धयाःम्ह मनू छ हे, मखु ला? उबलय् जिं छन्त इमिगु विरोधय् हइ धकाः यक्व दँ इमिसं अगमवाणी यात।
18 उखुन्हु थथे जुइ– गोगं इस्राएल देशयात हमला याइबलय् जि तसकं तंचाये, जि, परमप्रभु परमेश्वर न्ववानागु दु।
19 धात्थें इस्राएल देशय् उबलय् तसकं भ्वखाय् ब्वइ धकाः जिं थःगु च्याःगु डाहाया तंम्वय् घोषणा याये।
20 समुद्रयापिं न्यात, आकाशयापिं झंगःत, मैदानयापिं पशुत, जमिनय् थुखे उखे जुइपिं फुक्क प्राणी अले पृथ्वीइ दुपिं फुक्कं मनूत जिगु न्ह्यःने थुरथुर खाइ। पहाडत फातापुली, भीरत कुचा कुचा जुइ, फुक्क पःखाः दुनी।
21 जिं थःगु फुक्क पर्वतय् गोगया विरोधय् छपु तरवार छ्वये, जि, परमप्रभु परमेश्वर न्ववानागु दु। फुक्क मनूतय्गु तरवार थःथः दाजुकिजाया विरोधय् चले जुइ।
22 जिं महामारी व हिबाःपाखें वयागु न्याय याये। जिं वयाके, वयागु सेनायाके व वलिसें दुगु जाति जातिया भीडयाके तसकं वाफय् वय्काबी, प्वँ गाय्काबी, च्यानाच्वंगु गन्धक गाय्काबी।
23 थुकथं फुक्क जातितय्त जि तःधंम्ह व पवित्रम्ह खः धकाः क्यने। अबलय् इमिसं जि हे परमप्रभु खः धकाः सी।’”