1 परमप्रभुया शक्ति जिके वल, अले वय्कलं जितः परमप्रभुया आत्मापाखें पित हयाः क्वँय् हे क्वँय् दुगु मैदानया दथुइ तयादिल।
2 वय्कलं जितः मैदानया प्यखें यंकादिल। जिं ख्यःया बँय् यक्व क्वँय्त खना, उपिं क्वँय्त तसकं गंगु दु।
3 वय्कलं जितः न्यनादिल, “अय् सीमानिम्ह मनू, थुपिं क्वँय्त हाकनं म्वाये फइ ला?”
4 वय्कलं जितः हाकनं धयादिल, “थुपिं क्वँय्तय्त अगमवाणी यानाः धा, ‘हे गंगु क्वँय्, परमप्रभुयागु वचन न्यँ!
5 थुपिं क्वँय्तय्त परमप्रभु परमेश्वरं थथे धयादी – जिं छिमिके सासः थनाबी, छिपिं हाकनं म्वाइ।
6 जिं छिमिके नसा व ला तयाबी, अले छेंगुलिं त्वपुयाबी, छिमिके सासः तयाबी, अले छिपिं म्वाइ। अले छिमिसं जि हे परमप्रभु खः धकाः सी।’”
7 उकिं वय्कलं आज्ञा बियादीगु थें जिं अगमवाणी याना। जिं अगमवाणी यानाच्वनाबलय् हे अन घ्वार्र सः वल। उपिं क्वँय्त थःथवय् प्यपुन।
8 जिं स्वयाच्वनाबलय् हे उपिं क्वँचय् नसा व ला खनेदत, अले उपिं क्वँय्तय्त छेंगुलिं त्वःपुल, तर इमिके सासः मदु।
9 अले वय्कलं जितः धयादिल, “फय्यात अगमवाणी या, अय् सीमानिम्ह मनू, अगमवाणी यानाः थथे धा, ‘परमप्रभु परमेश्वरं थथे धयादी – अय् फय्, प्यखेरं वयाः थुपिं स्याःपिन्त सासः थनाब्यु, इपिं म्वायेमा।’”
10 उकिं वय्कलं जितः आज्ञा बियादीगु थें जिं अगमवाणी याना, अले सासः उपिं म्हय् दुहां वन, इपिं म्वात अले इपिं थथःगु तुतिइ दन, इपिं छगू तःधंगु सेना जुल।
11 अले वय्कलं जितः धयादिल, “अय् सीमानिम्ह मनू, थुपिं क्वँय्त इस्राएलया फुक्क घराना खः। इमिसं धाइगु, ‘झीगु क्वँय्त गनावने धुंकल, अले झीगु आशा मदये धुंकल, झीपिं नाश जूगु दु।’
12 उकिं अगमवाणी यानाः इमित धा, ‘दकलय् तःधंम्ह परमप्रभु परमेश्वरं थथे धयादी – हे जिमि मनूत, जिं छिमिगु चिहानत चाय्काः छिमित अनं लिकायेत्यनागु दु। जिं छिमित इस्राएल देशय् लित हये।
13 अय् जिमि प्रजा, जिं छिमिगु चिहानत चाय्काः छिमित लिकाय्बलय् छिमिसं जि हे परमप्रभु खः धकाः सी।
14 जिं थःगु आत्मा छिमिके तयाबी, अले छिपिं म्वाइ। जिं छिमित छिमिगु थःगु हे देशय् तये। अले जि परमप्रभुं हे थथे धाःगु दु व पूरा नं याःगु दु धकाः छिमिसं सी, परमप्रभु परमेश्वरं धयादी।’”
15 परमप्रभुयागु थ्व वचन जिथाय् वल,
16 “अय् सीमानिम्ह मनू, सिँयागु छपु कथि कयाः उकी ‘यहूदायागु व वलिसें मिलय् जूपिं इस्राएलीतय्गु धकाः च्व।’ अले मेगु सिँयागु कथि कयाः उकी ‘योसेफयागु अर्थात एफ्राइम व वलिसें मिलय् जूपिं इस्राएलीतय्गु कथि’ धकाः च्व।
17 अले उपिं निपुयात छपु हे यानाः स्वानाब्यु। उपिं छंगु ल्हातय् छपु हे कथि जुइ।
18 “छिमि मनूतय्सं उकिया अर्थ छु खः धकाः छन्त न्यनीबलय्
19 छं इमित थथे धा, ‘परमप्रभु परमेश्वरं थथे धयादी – जिं योसेफ वलिसें मिलय् जूपिं इस्राएलीतय्गु कथि काये, गुगु एफ्राइमया ल्हातय् दु। व कयाः उकी यहूदाया कथि स्वानाबी। थुकथं जिं इमितनापं तयाः छपु हे यानाबी। उपिं जिगु ल्हातय् छपु हे जुइ।’
20 “इमिगु हे मिखाया न्ह्यःने छं च्वःगु उपिं कथि ज्वनाच्वँ।
21 अले इमित धा, ‘परमप्रभु परमेश्वरं थथे धयादी – जिं इस्राएलीतय्त इपिं वनाः च्वनाच्वंगु जातितपाखें लिकाये। जिं इमित प्यखेंपाखें मुंके, अले इमित थःगु हे देशय् हये।
22 जिं इमित थःगु हे देशय् इस्राएलया पहाड पहाडय् छगू हे जाति दय्के। इपिं सकसिगु लागि छम्ह हे जुजु जुइ। इपिं हाकनं गुबलें निगू अलग अलग जाति अथवा निगू अलग अलग राज्य जुइ मखु।
23 इमिसं थःम्हं थःत हाकनं गुबलें थःगु घच्चाइपुगु मूर्तित वा झ्वातात अथवा मेगु छुं नं अपराधपाखें अशुद्ध याइ मखु। छाय्धाःसा जिं इमिगु पापी पहःचहःपाखें इमित बचय् याये, इमित शुद्ध याये। इपिं जिगु प्रजा जुइ, जि इमि परमेश्वर जुये।
24 “‘जिम्ह दास दाऊद इमि जुजु जुइ, इमि छम्ह हे फैजवाः जुइ। इमिसं जिगु नियम पालन याइ, अले जिगु विधित पालन यानाः वकथं जुइ।
25 जिं जिम्ह दास याकूबयात बियागु देशय् इपिं च्वनी, अन इमि पुर्खात च्वनाच्वंगु खः। इपिं व इमि सन्तानत न्ह्याबलें अन च्वनी। जिम्ह दास दाऊद न्ह्याबलेंया निंतिं इमि शासक जुइ।
26 जिं इपिंलिसें शान्ति व सुरक्षाया बाचा ची, व न्ह्याबलेंया लागि जुइ। जिं इमित थापं याये, जिं इमिगु ल्याः अप्वय्काबी। इमिगु दथुइ जिं थःगु पवित्रथाय् न्ह्याबलेंया लागिं तये।
27 जि च्वनेगु थाय् नं इमिगु हे दथुइ दइ। जि इमि परमेश्वर जुये, इपिं जिम्ह प्रजा जुइ।
28 जिगु पवित्रथाय् न्ह्याबलेंया लागि इमिगु दथुइ दयाच्वनीबलय् जाति जातितय्सं इस्राएलयात पवित्र याइम्ह जि हे परमप्रभु खः धकाः सी।’”