1 जिमित ज्वनाः बेबिलोनय् यंकूगु झिंनिगूगु दँया झिंछगूगु लाया न्हापांगु दिंखुन्हु परमप्रभुया थ्व वचन जिथाय् वल।
2 “अय् सीमानिम्ह मनू, यरूशलेमया बारे टुरोस शहरं थथे धाःगु दु, ‘आहा! जाति जातियापिं मनूतय् मू ध्वाखा दुंगु दु। ध्वाखात जिगु निंतिं चाःगु दु। व नाश जुल, आः जि च्वन्ह्याइ।’
3 अथे जुयाः जि, परमप्रभु परमेश्वरं थथे धाये – अय् टुरोस शहर, जि छंगु विरोधय् दु। समुद्रं लबुत हःगु थें जिं यक्व जातितय्त छंगु विरोधय् हये।
4 इमिसं टुरोसया पःखाःत थुनाबी, अले उकिया धरहरातय्त क्वथलाबी। जिं उकिया ल्वहंत प्वतु प्वलाः उकियात नांगागु भीर थें यानाबी।
5 व समुद्रय् छगू नांगागु ल्वहँधी, समुद्रया दथुइ जाः ह्वलीगु थाय् जुइ, छाय्धाःसा जिं धयागु दु, परमप्रभु परमेश्वरं धयादी, उकियात जाति जातितय्सं लुटपाट याइ।
6 अले देशया मू भागया बस्ती बस्तीइ च्वंपिं मनूतय्त तरवारं स्याइ। अले इमिसं जि हे परमप्रभु खः धकाः सी।”
7 “परमप्रभु परमेश्वरं थथे धयादी – जिं उत्तरं जुजुतय् जुजु बेबिलोनया जुजु नबूकदनेसरयात सलत, रथत, सलगइपिं व छगू तःधंगु सेना ज्वनाः टुरोसयात हमला यायेत ब्वनाहये।
8 वं देशया मू भागया बस्ती बस्तीइ च्वंपिं मनूतय्त तरवारं स्याइ। वं छंगु विरोधय् चा व ल्वहं द्वंचिकाः द्वम्बःचा दय्काः छन्त हमला याइ अले ढालत ल्ह्वनी।
9 वं पःखाः तछ्याइगु तग्वःगु धलिंनं छंगु पःखाः तछ्याइ। वयागु हतियारं छंगु धरहरात थुनाबी।
10 वया सलत यक्व अप्वः दइ, वया सलतय्सं ब्वय्कूगु धुलं छन्त त्वपुइ। पःखाः दुंगु शहरय् मनूत दुहां वंगु थें व छंगु मू ध्वाखां दुहां वनीबलय् लडाइँया सलत, गाडात व रथतय्गु सलं छंगु शहरया पःखाःत लिगिलिगि सनी।
11 वया सलया ख्वलं छंगु फुक्क लँयात न्हुत्तुन्हुइ। वं छिमि मनूतय्त तरवारं स्याइ, छंगु बबलाःगु थनातःगु ल्वहंत बँय् क्वःदली।
12 इमिसं छंगु धन-सम्पत्ति लुतय् याइ, छंगु व्यापारया मालताल लुतय् यानाः यंकी। इमिसं छंगु पःखाः थुनाबी अले बांबांलाःगु छेँयात नाश यानाबी। छंगु ल्वहं, सिँ व चायात समुद्रय् वांछ्वयाबी।
13 जिं छंगु म्येयागु सः दिकाबी। छंगु वीणाया सः हाकनं ताये दइ मखु।
14 जिं छन्त नांगागु भीर यानाबी, छ जाः ह्वलिगु थाय् जुइ। छन्त हाकनं गुबलें दय्की मखु। छाय्धाःसा जि परमप्रभुं हे थ्व खँ धयागु खः।”
15 “परमप्रभु परमेश्वरं टुरोस शहरयात थथे धयादी – घाःपाः जूपिं सास्ती जुयाः चिल्लाय् दनाः हालीबलय् अले छिमिगु दथुइ स्याये पाले जुइबलय् छ क्वःदगु सः न्यनाः समुद्र सिथय्या देशत थुरथुर मखाइ ला?
16 अबलय् समुद्रया सिथय् दुगु देशयापिं फुक्कं शासकतय्सं थथःगु सिंहासनं क्वहां वयाः थथःगु वसः त्वइ, बुत्ता भरय् यानातःगु वसः त्वइ। ग्यानाः इपिं थुरथुर खाइ। इपिं बँय् च्वनाः थरथर खायाच्वनी, अले छ खनाः वातां जुइ।
17 इमिसं छंगु बारे बिलापया म्ये दय्काः छन्त धाइ,
18 आः छंगु पतनया दिनय् समुद्र सिथय्यागु देशत थुरथुर खाइ।
19 “परमप्रभु परमेश्वरं थथे धयादी – जिं छन्त मनूत मदुगु शहरत थें छगू तहसनहस जूगु शहर याइबलय् जिं तज्जाःगु समुद्रयात छंगु च्वय् हये, उकिया ततःधंगु लबुतय्सं छन्त त्वपुइ।
20 अबलय् जिं छन्त पातालय् वनेधुंकूपिं पुलांगु ईयापिं मनूतय्थाय् छ्वयाबी। जिं छन्त पृथ्वीया क्वय् सदांया निंतिं नाश जूगु थासय् च्वनेबी। अले छ हाकनं गुबलें म्वाःपिनिगु देशय् लिहां वयाच्वनी मखु।
21 छ म्वाना मच्वनेमा धकाः जिं छन्त ग्यानापुसे च्वंक सिधय्काः बी। छन्त माली तर सुनानं छन्त लुइके फइ मखु, जि, परमप्रभु परमेश्वरं धाये।”