1 Chicahuac nijtzajtzilía Toteco Dios para ma nechpalehui.
2 Quema nechajsic miyac taijyohuilisti nimantzi nijtemo noTeco.
3 Nimoyolilhuía ten Toteco Dios huan niyolpitzahuía huan nichoca.
4 Toteco, ta amo techcahuilía ma nicochi.
5 Talojtzitzi nimoyolilhuía ten nopa cuajcualtzi tonali huan xihuime cati panoque huejcajquiya.
6 Niquelnamiqui nopa yohualme quema nihuicayaya ica paquilisti.
7 ¿Huelis Toteco nechtahuelcajtoc para nochipa?
8 ¿Huelis ya tanqui itaicnelilis ica na?
9 ¿Huelis Toteco Dios ya quielcajqui para monequi nechchihuilis cati cuali na cati niitztoc ipan tequipacholi?
10 Huan ipan nohueyi tequipachol nimoilhui:
11 Más cuali niquelnamiquis nochi nopa huejhueyi tiochicahualnescayot cati TOTECO nechchihuili huejcajquiya.”
12 Quena, mojmosta nimoilhuis ten nopa huejhueyi tamanti para nochipa.
13 ¡NoTeco Dios, nelía tatzejtzeloltic nochi moojhui!
14 ¡Ta tiDios cati tijchihua huejhueyi tiochicahualnescayot huan miyac tamanti cati masehualme quitachilíaj!
15 Ica mohueyi chicahualis techmanahui,
16 Toteco Dios, nopa hueyi at cati itoca Chichiltic momajmati quema mitzitac.
17 Nopa mixti quichijqui ma huetzi at chicahuac.
18 Caquistic tatomonilot ipan nopa hueyi ajcomalacat.
19 Tijchijqui se ojti quema tiquixcotonqui nopa hueyi at,
20 Huan ipan ni ojti tiquinyacanqui momasehualhua quej elisquía pilborregojtzitzi inimaco Moisés huan Aarón.