1 ¡Xijtascamatica TOTECO pampa yaya nelía cuali!
2 Nochi amojuanti cati TOTECO amechmanahuijtoc, xitepohuilica.
3 Yaya ya quinsentilijtoc nochi nopa masehualme cati itztoyaj campa hueli ipan taltipacti.
4 Sequij nentinenque ipan huactoc tali,
5 Amictinemiyayaj huan mayantinemiyayaj,
6 Huajca quitzajtzilijque TOTECO para ma quinpalehui,
7 Quinyacanqui xitahuac ipan se ojti cati temachti.
8 Xijhueyimatica TOTECO pampa yaya tahuel tetasojta,
9 Pampa Toteco quitamaca cati teicneltzi huan mayantinemi.
10 Sequij inijuanti itztoyaj ipan tzintayohuilot ipan tatzacti huan nechca para miquise.
11 Ya nopa ininpantic pampa inijuanti moyoltetilijque ica cati TOTECO quinnahuatijtoya,
12 Yeca Toteco quincajqui ma taijyohuica ipan nopa tequit cati tahuel teticayo.
13 Huajca quema ayecmo quimatiyayaj taya quichihuase ica nopa taijyohuilisti,
14 Quinquixti ipan nopa tzintayohuilot huan quinmanahui para amo miquise.
15 Xijhueyimatica TOTECO pampa yaya tahuel tetasojta huan quichihua huejhueyi tamanti cati ica masehualme san quitachilíaj.
16 Pampa yaya quitapanqui nopa miyac caltemit ten bronce ipan tatzacme,
17 Sequij masehualme tahuel mohualiquilijque taohuijcayot,
18 Huan ipan nopa taijyohuilisti ayecmo mayanayayaj por inincocolis huan pampa itztoyaj nechca para miquise.
19 Pero quema ayecmo quimatiyayaj taya quichihuase ica nopa taijyohuilisti,
20 Toteco camanaltic huan mochicajque.
21 Xijhueyimatica TOTECO pampa yaya tahuel tetasojta huan quichihua huejhueyi tamanti cati nochi quitachilíaj.
22 Xijpaquilismacaca Toteco huan yaya quiitas quej elisquía se tacajcahualisti.
23 Nopa masehualme cati nemij ica inincuaacalhua ipan hueyi at,
24 nojquiya quiitztoque nopa cuajcualtzitzi tamanti cati TOTECO quichijtoc ipan at.
25 Quiitztoque quema TOTECO camanaltic huan quichijqui ma motanana se ajacat cati chicahuac,
26 Nopa cuaacalme motananayayaj huan sempa huetziyayaj atatzinta.
27 Inijuanti huihuipicaque huan momimilojque quej ihuintini,
28 Huajca quema itztoyaj ipan taohuijcayot,
29 Quema huetziyaya at huan taajacayaya chicahuac,
30 Huan inijuanti pajque miyac quema quiitaque ya moquetzqui nopa at.
31 Ma quihueyimatica TOTECO pampa yaya tahuel tetasojta,
32 Ma quipaquilismacaca Toteco miyacapa iniixpa nochi masehualme huan iniixpa nopa huehue tacame cati tayacanaj ipan nopa tali.
33 Toteco quinhuatztoc hueyame huan quinchijtoc quej huactoc tali.
34 Nopa cuali tali cati tahuel taeliltía quichijtoc ma ayecmo taelilti.
35 Pero nojquiya nopa huactoc tali campa amo teno eli quichijqui ma taelilti.
36 Huan quinhuicac nopa masehualme cati mayantinemiyayaj para ma itztoca nopona,
37 Nojquiya quichijqui para ma tocaca ipan mila,
38 TOTECO tahuel quintiochijqui.
39 Teipa pejqui caxani inimiyaca nopa masehualme,
40 Huan yaya quinechcapantali nopa tayacanani cati mohueyimatiyayaj,
41 Pero yaya quinmanahui nopa teicneltzitzi.
42 Ma quiitaca nochi cati quichijtoc TOTECO nochi cati nemij xitahuac iixpa,
43 Masehualme cati talnamiquini quimachilise nochi ni tamanti cati Toteco quichijtoc,