1 O Anutu, nu ta king tio. Nio ko aŋwit urum isala kor,
2 Aigule ta boozomen nio ko aŋpakurkuru pa kampeŋana ku,
3 Yooba, ni ta biibi ŋonoono. Takam ŋgar pini na tarao som. Tanata tomtom tiwidit uruunu ma isala kor kat!
4 Tomtom ko tipepeebe len kelŋan, mi tiwidit urum pa uraata ku ndabokbokŋan, mi tizzo zin pa.
5 Ko tizzo pa mburom, zom biibi, mi azuŋka ku ta ilip kat.
6 Tomtom ko tizzoyaryaara uraata ku mburanŋan ta tomtom tire ma timoto na.
7 Tomtom ko matan iŋgalŋgal kampeŋana ku biibi mi tizzoyaryaara uruunu.
8 Pa Yooba, ni leleene izanzaana pizin mbesooŋo kini, mi imuŋaiŋai zin mi ikampewe zin.
9 Yooba, ni ikamam mbulu ambaiŋana pa tomtom ta munŋaana men.
10 O Yooba, koroŋ boozomen ta itum ur zin, nako timap ma tipakur zom.
11 Ko tizzo pa peeze ku ta mburaanaŋana mi ndabokŋana kat na.
12 Naso tomtom ta boozomen tiute ta kembei: Nu kamam uraata mburanŋan.
13 Peeze ku ko iseeŋge iseeŋge ma ila.
14 Zin wal ta so pataŋana ipun zin ma mburan imap na, ni iuluulu zin. Mi wal boozomen ta pataŋana ikototo zin na, ni isilou zin.
17 Yooba mbulu kini ta boozomen iswe i kembei ni ndeeŋeŋana.
18 Zin wal ta so titaŋroro i raama lelen,
19 Mi zin wal ta timototo i mi tileŋleŋ la kalŋaana na, sombe lelen pa koroŋ pakan mi tisuŋi pa, na ni ikamam pizin.
20 Tana zin wal ta tiurur lelen pini na, ni mataana pizin mi imenderkalkaala zin.
21 Nio kwoŋ ko ipakurkur Yooba.