1 Mwa Yaubada! Bogwa kaligakaisi taigamasi.
2 Ilivalasi ammakawala yoku titoulem kubokavili matausina gala inikolaimsi,
3 M tomota gala iyoulisi valu metoya osi kema titoulesi.
4 Yoku ulo Guyau deli ulo Yaubada.
5 e metoya om peula kakalisauwaisi kama tilaulasi.
6 Gala wala adubumi ulo kaiyala
7 Mitaga yoku bogwa kukolaimasi metoya kama tilaulasi
8 Bakayakawolaimsi tuta komwaidona
9 Mitaga baisa tuta bogwa kupakaimasi e kutagwala bikalisauwaimasi.
10 Yoku lokuvigakaimasi lakasakaulasi metoya kama tilaulasi,
11 Yoku kutagwala kidamwa bikatumataimasi makawala sipi.
12 Yakamaisi m tomota bogwa kugimolaimasi e mapumasi kusaili watanawa,
13 Matausina otalimasi igisaisi avaka lokuvigakaimasi,
14 Yoku kuvigakaimasi kabokalawou oluwalaisi boda ituwoli ituwoli.
15 Yeigu tuta komwaidona iyomsilaigusi wala.
16 paila uula anakaigali si vakaluwou deli si bigigaga
17 Komwaidona vavagi makwaisina bogwa iviloubusisi baisa yakamaisi,
18 Yakamaisi gala wala kakoulovaimsi,
19 Mitaga yoku kuluvaimwaimasi iuwakaimasi neuya oluwalaisi mauna nagigasisi,
20 Kidamwa bogwa lakasimwaisi tapwaroru baisa yoku ma Yaubadasi,
21 yoku bogwa wala bukubani,
22 Yam komwaidona makateki bakakaligasi paila goli yoku.
23 Mwa! Guyau, kumamata! Avaka paila kummasisi?
24 Avaka paila kusipepuni metoya baisa yakamaisi?
25 Yakamaisi kakapusisi watanawa deli kala mama uwomaisi.
26 Kuma kupilasaimasi!