1 Gala bukuninayuwa tutala kuninamsi tomitugaga.
2 Makateki bitamwausi makawala mnumonu kalasia eikalimati,
3 Kudubumi Guyau, e deli kumitukwaibwaila.
4 Bukubani uulotoula m mwasawa baisa Guyau,
5 Bukutugwalaim baisa Guyau.
6 Matauna bivigaki m mitukwaibwaila makawala kalasia iyuwoula,
7 Bukupeuloki e kutulotula bukugisi avaka Guyau bivagi,
8 Gala bukutagwala kidamwa ninayuwa kaina gibuluwa mwada bikau nanom.
9 Matausina availa availa idubumaisi Guyau, matausina goli bisigagasi mapilana valu.
10 Igau goli makateki tomitugaga bitamwausi.
11 Matausina ninasi watanawa bisigagasi mapilana valu.
12 Tomitugaga inainevi ammakawala biyogagi tomitukwaibwaila,
13 Mitaga Guyau iyosokani tomitugaga,
14 Tomitugaga ibiigilaisi si puluta e iikwaisi si kaiyala
15 Mitaga kasi tilaula tomitugaga bitovilasi
16 Kaina tobwaila la guguwa pikekita wala,
17 Paila Guyau bikau si peula tomitugaga
18 Guyau iuvauli matausina availa availa ikabikuwolaisi matauna,
19 Gala bibodaisi mmayuyu wa tuta mwau.
20 Mitaga tomitugaga bikaligasi.
21 Tomitugaga isim kala wasi e gala avai tuta biuwoli makwaina.
22 Matausina availa availa Guyau imitukwaii
23 Guyau iuvakadaida bitala avai keda ibodi bitaloula,
24 Kidamwa takapusi, gala goli takanuvagasi,
25 Bogwa latomoya, e ulo tuta bogwa ikalisau,
26 Tuta komwaidona tobwaila matauna ililalasi deli itagwala availa biwasi baisa matauna,
27 Kutovilasi bukupakaisi mitugaga e bukumitukwaibwailasi,
28 Paila Guyau iyebwaili karaiwaga duwosisia,
29 Tomitukwaibwaila bisigagasi mapilana valu,
30 Matauna tobwaila saina tobigabwaila,
31 Ikabikuwoli la Karaiwaga la Yaubada onanola,
32 Tomitugaga iiyausi tomitukwaibwaila,
33 Mitaga Guyau gala wala bitugwali matauna tomitukwaibwaila baisa kala tilaula,
34 Bukupikwakwaisi Guyau, e bukukwabikuwolaisi la karaiwaga makwaisina.
35 Omitibogwa yeigu anikoli taitala tomitugaga, saina giyougaga matauna.
36 Mitaga kwaitala tuta laliloula makadana, taga bogwa eitamwau.
37 Kuvitusaisi tobwaila, e kumitakavataisi tomitukwaibwaila.
38 Mitaga tomitugaga idoumlabasi wala,
39 Guyau ikatumovi tomitukwaibwaila,
40 Ipilasi e ikoli matausina.