1 Availa availa matausina gala isim pikolela uwosi, matausina goli imwasawasi.
2 Availa availa matausina ibokulaisi la karaiwaga makwaisina matausina goli imwasawasi.
3 Matausina gala avai tuta iuvagaisi sula,
4 Mwa Guyau! Lokusakaimasi makwaisina m kwaraiwaga
5 Saina apikwaku mwada bakimadagi
6 Kidamwa banakaigali komwaidona m kwaraiwaga makwaisina
7 Avai tuta kidikedala m kwaraiwaga duwosisia bikabitutukwaigu,
8 Bogwa bakabikuwoli m kwaraiwaga makwaisina.
9 Ammakawala taitala totubovau ibodi biyamati la bubunela bimigileu wala?
10 Avigikoni bawotitalaim metoya onanogu komwaidona.
11 Ayamati m Kwaraiwaga onanogu wala,
12 Mwa Guyau! Aiyakawolaim.
13 Yeigu balivilivau
14 Kaina bamwasawa kidamwa bayosi ulo guguwa bidubadu,
15 Atitakutu makwaisina m kwatuloluta
16 M kwaraiwaga makwaisina ivigaki ulo mwasawa,
17 Kumitukwaibwailigu yeigu m touwata,
18 Kuulaim matagu, kidamwa goli bagisibwailaki
19 Yeigu asisu baisa odabala pwaipwaia tuta pikekita wala,
20 Saina iyovi nanogu sainela,
21 Kukwamitilaki availa availa matausina ninasi walakaiwa,
22 Kutanekwaigu metoya osi bigigaga deli osi yousokana,
23 Tokwaraiwaga isigugulasi e ikeiwalaigusi,
24 M kwatuloluta ivigaki ulo kabomwasawa,
25 Yeigu ikalisauwaigusi e akanukwenu opwaipwaia.
26 Yeigu akamituli komwaidona avaka bogwa lavagi, e yoku kuvitakaulokaigu.
27 Kupilasaigu e gagabila bitapuloki nanogu makwaisina m kwaraiwaga,
28 Yeigu ninamwau wala iyomami wowogu.
29 Kukolaigu mwada taga basula ogu keda,
30 Yeigu bogwa lanagi paila bakabikaula,
31 Mwa Guyau! Yeigu bogwa labokuli m kwatuloluta,
32 Yeigu bapwaitukula paila babokuli makwaisina m kwaraiwaga,
33 Mwa Guyau! Kuvitulokaigu uulotoula makwaisina m kwaraiwaga,
34 Kukwatumiki m Kwaraiwaga baisa yeigu, e bakabikuwoli wala,
35 Kuvigakaigu bakabikuwoli m kwatuloluta,
36 Gala magigu bidubadu ulo guguwa.
37 Kuyamataigu mwada taga bikau nanogu avai vavagi makwaisina gala isim dimlesi.
38 Kuvagi makawala m biga katotila baisa yeigu m touwata -
39 Kukolaigu metoya bigigaga makwaisina lakukoli.
40 Magigu bakabikuwoli m karaiwaga makwaisina,
41 Mwa Guyau! Kuvitulokaigu kala vakaila m yebwaili paila yeigu,
42 Oluvi yeigu ibodi bamapu si biga matausina ibigigagaigusi,
43 Kupilasaigu mwada tuta komwaidona balivala biga mokwita wala,
44 Yeigu tuta komwaidona bakabikuwoli m Kwaraiwaga,
45 Yeigu gala avaka biyomi wowogu,
46 Yeigu bakamituli m kwaraiwaga makwaisina baisa gweguya,
47 Kala kabikaula m kwaraiwaga makwaisina ivigaki ulo kabomwasawa,
48 Yeigu akamiabi deli ayebwaili m kwatuloluta.
49 Kululuwai m biga katotila baisa yeigu m touwata.
50 Deli goli ogu tuta mwau kuvisimolaigu,
51 Matausina ninasi walakaiwa tuta komwaidona iyosokanaigusi,
52 E Guyau aluluwai m kwaraiwaga makwaisina omitibogwa,
53 Avai tuta agisi tomitugaga iyogwalaisi m Kwaraiwaga,
54 Ogu tuta baisa odabala pwaipwaia,
55 E wa bogi aluluwaim,
56 Ulo kabomwasawa wala,
57 Mwa Guyau! Kammwaleta wala yoku magigu,
58 Ayokakapisi baisa yoku kidamwa bukunokapisaigu,
59 Bogwa lavitoki tolosila ulo bubunela.
60 Bananakwa goli, galaga baluvatuta,
61 Tomitugaga bogwa eileiyasi agu sikula
62 Olubulotoula yeigu amamata e asimalaula mwada bayakawolaim,
63 Komwaidosi matausina iuwotitalaimsi,
64 Mwa Guyau! M mitakwai ivakasuwoki wala valu watanawa.
65 Mwa Guyau! Bogwa lokuvagi makawala m biga katotila,
66 Kusakaigu kabitam deli ninitalapula,
67 Omitibogwa lavagi sula, e yoku lokumipukwaigu,
68 Yoku saina bwaina e saina toninabwaila yoku,
69 Matausina ninasi walakaiwa bogwa eisipulokaigusi,
70 Matausina tomota gala wala avaka itapuloki ninasi,
71 E agu mipuki makwaina eipilasaigu wala,
72 Makwaina Karaiwaga bogwa lokusakaigu kala nanamsa saina wala isiligaga baisa yeigu,
73 Yoku kububulaigu, deli kukolaigu.
74 Matausina availa availa itemmalaimsi bigigisaigusi deli si mwasawa,
75 Mwa Guyau! Bogwa anikoli m kwaraiwaga duwosisia,
76 Kutugwali m mitakwai bivisimolaigu,
77 Kunokapisaigu, e yeigu basisu tomomova,
78 Ibodi matausina ninasi walakaiwa bimmosilasi paila si tabinona sasopa baisa yeigu.
79 Ibodi matausina ititemmalaimsi bimakaiagusi,
80 Ibodi yeigu bakabikuwoli m kwatuloluta, e gala bisim pikolela wowogu,
81 Mwa Guyau! Bogwa lasomata latutulaim paila bukukwatumovaigu,
82 Matagu bogwa isomata vatoi paila avaka bogwa lokukwatotila,
83 Yeigu makawala wawa wala, gala isim dimlegu,
84 Ammakawala kala kaduwonaku batulotula tuvaila?
85 Tauwau tokaluvalova matausina gala ikabikuwolaisi m Kwaraiwaga.
86 Komwaidona m kwatuloluta ibodi wala bakadubumaisi.
87 Matausina bogwa wala makateki bipeulasi e bikatumataigusi.
88 Paila uula yoku tomitakwai kumitukwaibwailigu,
89 Mwa Guyau! M biga gala biwokuva, bikanigaga goli,
90 E m kimadagi bisetuwoli goli oluwalaisi tubwa komwaidona.
91 E vavagi komwaidona eikanuvagasisi omitibogwa e leima lagaila,
92 Ulo mwasawa uulotoula m Kwaraiwaga.
93 Yeigu gala avai tuta bakilavi m kwatuloluta,
94 Yeigu goli m vavagi - e, kukwatumovaigu!
95 Tomitugaga eitutulaigusi wala mwada bikatumataigusi,
96 E bogwa eitapuloki nanogu kidamwa vavagi komwaidona isim kalitulesi,
97 Saina ayebwaili m Kwaraiwaga.
98 Makwaisina m kwaraiwaga isisu onanogu tuta komwaidona.
99 Ulo kateta ikalisau komwaidosi agu tovituloki,
100 Ulo kabitam ikalisuwoli tommoya si kabitam,
101 Bogwa lapaiki komwaidona mitugaga,
102 Gala goli akilavi m kwatuloluta,
103 Kakamwenala m kwatuloluta saina simokainia,
104 Abani kabitam metoya om kwaraiwaga makwaisina
105 M biga ikugwaiyaigu makawala kaitapa omatagu,
106 Bogwa bavagi makawala ulo biga katotila saina mwau,
107 E Guyau, laboda mmayuyu saina mwaugaga.
108 Mwa Guyau! Bukulagi ulo nigada nokagutoki,
109 Tuta komwaidona abudoboda kabosilagi,
110 Tomitugaga ileiyasi agu sikula,
111 M kwatuloluta baisa ulo kaikeya.
112 Bogwa lanagi mwada bakabikuwoli makwaisina m kwaraiwaga,
113 Yeigu mina kukologu wala matausina gala ininatotilasi baisa yoku,
114 Yoku wala agu taboda deli agu tokwala,
115 Yokomi tomitugaga kusilavaigusi wala.
116 Bukusakaigu peula, makawala m biga katotila, e bamova goli,
117 Mwa! Kuyosaigu e bogwa bakwala,
118 Yoku kupaiki availa availa matausina ikoulovaisi makwaisina m kwaraiwaga.
119 Yoku kuvigaki matausina tomitugaga makawala wawa wala.
120 Yeigu isim agu kokola paila uula wala yoku.
121 Yeigu bogwa lavagi avaka duwosisia deli bwaina.
122 E kukwatotila mwada bukupilasaigu yeigu m touwata,
123 Matagu bogwa eisomata vatoi paila m kwatumova bipilasaigu,
124 Kuvigakaigu makawala m mitakwai,
125 Yeigu goli m touwata, mapaila kusakaigu ninitalapula,
126 Mwa Guyau! Baisa tuta m tuta paila bukuvagi avaka,
127 Yeigu ayebwaili goula sitana wala,
128 E mapaila abokuli komwaidona m kwatuloluta,
129 Makwaisina m kwaraiwaga saina kabokatubau,
130 M biga kala katumiki ivigaki makawala kaitapa,
131 Saina magigu balagi makwaisina m kwaraiwaga,
132 Kutovilakaigu e bukunokapisaigu,
133 Makawala m biga katotila, kukolaigu mwada taga bakapusi.
134 Bukukolaigu metoya matausina ilamidadaigusi,
135 Om mitakwai bukusividulaigu
136 Mitilagigu ibubusi makawala waya,
137 Mwa Guyau! Yoku tomitukwaibwaila
138 Karaiwaga makwaisina lokusakaimasi
139 Ulo gibuluwa ilululu olopogu makawala kova,
140 Kala kamokwita m biga katotila.
141 Yeigu gala avaka agu yeiwau e ikaluwouwaigusi wala,
142 M mitukwaibwaila bikanigaga goli,
143 Tuta komwaidona imomwau nanogu deli anokubukubu,
144 M kwatuloluta tuta komwaidona duwosisia.
145 Mwa Guyau! Onanogu komwaidona adou baisa yoku.
146 Adou baisa yoku.
147 Igau gala biyamtatoula adou baisa yoku paila pilasi.
148 Bogi komwaidona yeigu ammamata,
149 Mwa Guyau! Kunakaigalaigu, kunokapisaigu,
150 Agu tolamadada bogwa ivakatitaikinasi wala,
151 Mitaga yoku kuvakatitaikina baisa yeigu.
152 Tuta omitibogwa atakutu wala m kwatuloluta.
153 Mwa Guyau! Kugisi kagu mmayuyu e kukwatumovaigu,
154 Kupilasaigu ogu wotetila, deli kutanekwaigu.
155 E tomitugaga gala wala bukukwatumovi,
156 Mitaga yoku Guyau m nokapisi saina vakaigaga.
157 Agu tilaula deli agu tolamadada saina bidugaga,
158 Avai tuta bagisi matausina eiyogwalaisi m kwaraiwaga, yeigu saina wala agu leiya,
159 Mwa Guyau! Kugisi ammakawala layebwaili m kwatuloluta.
160 M Kwaraiwaga uulotoula baisa kamokwita,
161 Topeuligaga gala dimlela iwaigusi goli,
162 Ulo mwasawa gala bitakaibiga, paila uula goli makwaisina m biga katotila,
163 Yeigu kukologu deli saina agu leiya paila sasopa komwaidona,
164 Yam kwaitala kwaitala yeigu asivalima asivayu anokagutoki baisa yoku,
165 Matausina availa availa iyebwailisi m Kwaraiwaga bogwa ibanaisi kabokwala mokwita,
166 E Guyau latutulaim wala paila bukukwatumovaigu,
167 Yeigu akabikuwoli makwaisina m kwaraiwaga,
168 Yeigu akabikuwoli makwaisina m kwaraiwaga deli m kwatuloluta,
169 Mwa Guyau! Kutagwala bukulagi ulo dou paila pilasi!
170 Mwa! Kunakaigali ulo nigada,
171 Yeigu tuta komwaidona baiyakawolaim wala,
172 Yeigu bawosi butula m Kwaraiwaga
173 Ibodi tuta komwaidona bukukwatubaiasa paila bukupilasaigu,
174 Mwa Guyau! Saina magigu sainela m pilasi bikatumovaigu,
175 Mwa! Kusakaigu ulo momova, e gagabila bayakawolaim.
176 Yeigu awowau makawala natana sipi eitamwau,