1 Mwa Guyau, kululuwai avaka bogwa leikaloubusi baisa yakamaisi.
2 Tomitawasi bogwa leiyoulisi komwaidona ma guguwasi;
3 E tilaula bogwa leikatumataisi tumamaiasi,
4 Kama sopisi bakamipumapusi wala;
5 E bogwa lakasomatasi koukeula koni mwau, makawala ase deli kameli,
6 E kamasi avaka bibodi bikamovaimasi
7 Tubumaiasi omitibogwa imitugagasi e bogwa leikaligasi,
8 Kama tokaraiwagasi tomotamavaka wala, makawala matausina ula,
9 Tokatumata idededilasi wala oma kwabilasi;
10 Molu wala ivigaki ibulokatuwolaimasi,
11 E odabala Koya Saiyoni matausina iiyosisi ma kukovasi e imokaiasi;
12 Iyosisi kama tokugwasi isipwaisi kaiyasi e ilasouyasi wa kai;
13 E ikominimanaisi tauwau tubovau bitutusi witi
14 E matausina tommoya gala wala tuvaila isisigugulasi okalapisilela valu,
15 Mwasawa bogwa eitamwau kala pikowau metoya baisa yakamaisi.
16 E vavagi makwaisina lakakamnimonaisi gala wala kwaitala kesa.
17 Ma nanamsasi wala bogwa eibulokatuwolaimasi
18 paila uula Koya Saiyoni eivilouwokuva deli eiviloububu,
19 Mitaga Guyau, yoku wala Guyau tosivagasi,
20 Mwa Guyau, avaka paila saina tuta kaduwonaku lokusilavaimasi?
21 Guyau, kukwaimilivauwaimasi!
22 E ammakawala lokupakaitulaimasi tuta gala wala biwokuva kaina?