1 Neme aakone sua ekeraa goa palua loa agaa meda narogaa sape.
2 Gore aa medame nena bi minasaaliare ora epeta pare nena bipa nena bi naminasape.
3 Maeyae aanuna kone epe-rupa naimi-pulu go imi koneme niaa kedaa adaa meda geme.
4 Aa medaloma ratu yawoa wae pemenumi onaa yago kedaa adaapu pa mea kateme.
5 Waea pi aa meda maredepo rabu ne yago-rupa raana ome kone page kalo aaye.
6 Nena adami aanumi nimu raba meainalo radaa ora waru mea geme palo peme.
7 Aa medame eta luabu noa pua nipuna robaa-para rubita raburi alubi apaa ora ota pare reame ome aame rero pi eta nea rabu ora mada nalia.
8 Gore aa medame nipuna su ada gimoa pa pora pamu aaliare yaame nipuna piri-para gimoa pa riyaa pamuaya-rupa mada pamea.
9 Waele-sada page ora epe wabala waele luabu pema raburi niaa mada ora epe ta kone sua pedo waru pema.
10 Nena ona nogo naakinu-para nena adami aanu masaa narilape.
11 Naa naaki neme epe kone luabu mua epe pora luabu ratali-dare ne madaa epe kone salua.
12 Epe kone i aamere gore nipumi ora go-rupa makuaaya. Kedaa nipu mada epolalo palia-daare gore nipumi aipapulu mapakeaalia.
13 Aa medame mo aa yagona rudu neme abulalua loa wala naabutea-daare gore nipu wea aa yade.
14 Gore neme rui puri pabo loa nena adami aa-para ribaa reko te-dare nipu-para wae agaa temede-rupa mada te.
15 Aa medana ore agaa rado rado adaapu ne ona yaliare gore ada runane yai itipa-ta pogo pogo loatade-rupa mada pea.
16 Goa pea-pulu nipuna aanimi go agaa kone luabu magimaape-rupa mada dia.
17 Nimumi puri pane aeyane nepo papere wala aeyane yagome nepo peme.
18 Aa medame repenana ini etalia rabu go repenana ini raloa nalua kone salia-dare go repena ora waru surubalia.
19 Aa medame mo ipa ini-para adainaalia raburi nipuna ini agaa nipuna bipa adea.
20 Gore aa adaapu omalimi page pinawa. Mo aa tapa luabu mada narulatabalia.
21 Repena sulaame silipa golonu roa rakepeta.
22 Gore neme epe kone nai aa puri palo tali-dare omolalo palia-rabu nipuna maeyae kone mada nagimalia.
23 Goa palia-ga nena mena sipsip-para meme mena luabu waru surubape.
24 Gore akolo ya? Nena mone-re ne raapu oro yalo mada nasapiti.
25 Nena maapu-para ripu adaalu opalia-dare ponoa nena menanu nena mea sape.
26 Goa pua orope nena meme mena mada yoto mua su kabaina.
27 Goa puare nena mo meme mena adu ipaa muare nena nogo naaki ona raapu nape ipaa meaina.