1 Ne adaa aa meda raapu pirua eta no pirali-daare ne pa mo gialia eta madaa kone sua pirali.
2 Go page ne eta ora adaapu ne aa yaliare nena lo robaa rabuaniaawa gimape.
3 Neme mo aa muduna eta madaa ora pea kone nasape.
4 Ne mone orae amo aa mudu pirano kone sua kalai ogeapu pape.
5 Neme mone adaapupe sali pare go mone ora aipapulu dia yalia.
6 Oyaenu narumaae aa raapu eta padane-para nanape.
7 Go piaene aa raapu eta nali-dare mo aame ne gupa lagialia. Eta ipa oyae luabu apo ia-ga nena raana palia-rupa aipapulu nabape tea.
8 Goa pua neme eta no kiritua aana pea luabu ado kirituare mo mea nalide eta luabu wala maaku ratu rubali-ga mo tede omeme pi agaa page puri napaloa ini namadialia.
9 Aa meda kone epe-rupa nasalia raapu neme agaa nalape.
10 Ora abade su robo isimidere neme wala yolamonea meda nasape.
11 Adaa Aa-re amame padane-para madini nona pi aaya-pulu mo nogo naakinu rabamealia.
12 Gore ne agaa mana lagialoga go agaa mana waru pagoa makuape.
13 Neme nogo naaki tua kuma mapape madaare paalame naomape.
14 Dia neme goa pali raburi maredepo yali-daa nipu ome onaana su-para mada napalia.
15 Naakinumi epe kone-para epe makuae yae mealimi rabu nena pu robaa-para page ora epealia.
16 Neme nena epe redepone agaa pagape madaare raana ora waru pea.
17 Neme waea peme aanuna pemea adoa epame na-omape.
18 Neme go pora ratu pirali-dare nena orope pirape yaere ora epeaalia.
19 Naa naakimi naa agaa pagoa epe kone mea.
20 Nere ipa waini-para eta ora adaapu neme aanu raapu padane-para napamuape.
21 Ipa bia-para eta adaapu neme aanu nimu ora naraa piralimi.
22 Nena aapame ne maopasa-ga nipuna agaa waru pagape.
23 Neme ora waru puri paloa epe kone-para epe kogono pape-para epe makuae yae meape madaa puri paloa kogono pape.
24 Gore aa medame epe kone sua epe pora ratalia-daare nipuna aaraame go naaki madaa raaname ora waru omea.
25 Neme go agaa pagoa epe pora luabu ratali raburi nena aama-aapame ne ora epe ta loa adaa raaname omoa pedo pedo waru palipi.
26 Go naaki neme nina kone ora waru adoa naa agaa pago pirali-daare epe yae luabu adaina.
27 Wae paake aa rume onare ipa naaku meda-rupa yapulu go-para lopoladere pua omaalimi.
28 Go piaene onanuri paake ne aanumi pemede-rupa surubaeme-ga waru adalepape.
29 Aa apimi kedaa naloa nipuna bipa odo omea pae?
30 Go aanu luaburi oro yalo ipa bia-para wain lapo noa maeyae aanu yade.
31 Mo wain nipu epe pepena pua ranapi yae saliare nena kone-para ora mea gi tea gimape.
32 Wala ekeraa ribareko raburi paaka wae medame onaa nalade-rupa mada palia.
33 Gore nena kone luabu ora oyalia rabu neme oyae rado meda ade nona palia.
34 Goa pua ne pate raburi ipa sipi mo solowara mada pulaina so sipina ini kadu madaa piri nona palia.
35 Goa pua neme gupa te.