1 Aa padane nipu ode aawaliare nipuna bipa nipuna agu raapo kone-sua awalia.
2 Epe kone nasu epea napea aamere mo epe pora epe kone meapere gimi omea.
3 Waea puaaya aamere aa yago medalomare naepe ta-ga pinawa kone ia.
4 Epe kone i aame agaa tea rabu nipuna-ta agaa mada epe kone mealimiri go agaa epeta-da pageme.
5 Aa meda wae pupitagi noa koso madaa aaliare go aana koso rabamu laata ne napope.
6 Epe kone na-i aamere pa onaa raapu yada agu pulalo pea.
7 Kone waru na-i aa medame agaa tea-dare nipuna go agaame nipu ma-oyaaya.
8 Aa medana maa agaa paema rabu go agaa pagape madaa raaname waru omeme.
9 Wae kiaa rakepene aare nimuna bipa nipu ma-oyaya.
10 Adaa Aa-re puri pabe ada-rupa aaya.
11 Amone aanu nimuna moneme nimu kutapua ora epe-rupa surubalia kone imi.
12 Gore aa meda nipu pupitagi noa nipuna bi minasaliare orope nipu oyalia.
13 Aane waru lobapaina pirua agaa aba waru pagoa orope agaa abulape.
14 Aa meda nipu yaina omoa yapare kone puri paboa piraliare go yaina mada perekealia.
15 Aa meda nipumi epe kone sua nipumi oyae rado rado waru makuaatalo pea yae luabu waru makuaaya.
16 Gore neme adaa aa meda raapu agaa talo pali-daare neme nipu pa ode kalape yae meda aba ripinape.
17 Aa meda nipu kosona ini-agaa madaa aawa agaa teare nipu koso wini pape nonapiaene agaa tea.
18 Aa laapona rikiraane koso aapimi ora wini palialo abi nalapaeme raburi apimi wini palia pala marea teme.
19 Nena ame meda wae kone saliri nipumi go kone mea rogasua ne raaname na-omalia. Gore onaa medalome mo ada kagurena pora gape poaeme-rupa mada nimu runane pope-rupa maralimi.
20 Neme agaa epe-rupa loa redepone-rupa te rabu nena lo robaa-para raana waru palia.
21 Nena tede agaame onaa epe-rupa mapiraali. Nena agaame agu onaa ma-oyaawa onaa maepeaalia.
22 Neme ona meda rumali-daare gore ora epealia.
23 Naraame amope oyae pawa agaa mea.
24 Gore aa meda nipuna adami aa adaapu aaliare go aa nipu oyalia.