1 Aa medaloma nimu ora epe kone madaa raaname omoa pa aa medame maredepo agaame madaa page epealia kone imi.
2 Gore aame epe pora ratua epe kone suayare Adaa Aa-me go aa nipu epe lo robaa kata.
3 Gore aa meda waea pua epe-rupa napiralia raburi go peame nipu mada naraba mealia-pulu epe-rupa napitia. Nipu puri pabo page napiralia.
4 Aa medana oreme epeanu paliare mo aani go pea kogono-me epe bi kata.
5 Epe redepo ne aa-mere oro yalo epea pape madaa raaname waru omea.
6 Wae aanuna agaa-re aa medalomame kudiripu yada sua aa yago tulalo pemede-rupa kone imi.
7 Aa medame waea pualiare nipu oyoa ora alupalia.
8 Aa meda nipu epe kone su aaliare onaame go aa nipuna bi minasalimi.
9 Aa meda bi waru na-i aa yapare kogono aa meda nipuna ada-para ma-aaliare epe ta.
10 Epe redepone aanumi nimuna mena oyae luabu madaa odome waru omoa epe-rupa surubeme.
11 Aa medame nipuna e maapu waru surubaliare gore nipuna eta nape yae waru salia.
12 Wae aanu pupitagi noa oyae adaapu wae-rupa meme. Goa pua nimumi oyaenu madaa epame waru omeme.
13 Wae aa nimuna teme wae agaa-me nimuna bipa nimu adita.
14 Neme tede epe agaa-para nena epe pamualide porame ne maepealia.
15 Kone epe-rupa na-imi aanumiri nimuna pema oyae rayo ora epe ta kone imi.
16 Epe kone naimi aanumi waea meda pulalo peme raburi nimumi go madaa ratu aipapulu yaweme.
17 Koso rabami aa epe yaliare agaa waru eperupa tea.
18 Aa medame kone waru nasua tea agaa-me epe aa medana robaa-para maoyalia.
19 Yaa teme agaa luaburi pa rudupu yapina ia rabu aanumi kone rugulaawa gimeme.
20 Aanumi waea peme rabu go pemeame nimuna bipa nimu makiraeme.
21 Redepone aanumi pupitagi page ora nanoa epe oyae mealimi.
22 Yaa-agaa teme aanu luaburi Adaa aa-me nimu ratu waru yawoa gimea.
23 Aa meda nipumi epe aanu puayare nipuna epe kone epea luabu aipapulu ratea.
24 Kogono radaa pina paliade aare nipu puri mua mada pitea.
25 Go page aa medame oro yalo kone adaapu su aalia-dare nipuna kone oyo tua maeyae aa-rupa pitia.
26 Epe redepone kone i aanumi nimuna adami aanu epe pora mea wateme.
27 Kiaa rakepene aame yapa asa nola palia pare mo yapa mada natalia.
28 Aa neme epe pora ratua aawaliri ne ora epe-rupa oro yalo pirape yada mua ne epe-rupa pirali.