1 Madayaw hi APU DIOS!
2 Ad uwanin kataguk ya dayawok nan AP-APU an Dios ku ya ikantak di pundayaw kun hiya ad uwanin mataguwak.
3 Hana ot ta mundinol kayun hiya ta bokon hay taguy pundinolan te takon di natag-ey saad ya adida kabaelan an mangihwang ke dakayu.
4 Man-uke ya mate da damdamat mumbalin dah lutat maid di hilbin am-in di implanu dan aton.
5 Umamlong nan tagun baddangan APU DIOS an Dios Jacob. Om, umamlong nan tagun idinol nay nitaguwanan hiya an
6 nunlutuh kabunyan, luta, baybay ya am-in nadan matagun wadah di. Hiya an DIOS ya paannungonan am-in di kalyonan atona.
7 Hiyay bumanaddang nadah tatagun mipaligligat hi maid di gapuna. Ya idat nay kanon nadan maagangan.
8 Kaanonay kulap nadan nakulap ta pakatibo da, pakodholonay nomnom nadan nadismaya ya ongal di pamhod na nadah makangngun-unud ke hiya.
9 Ipaptok na nadan nalpuh udum an boblen makiboblen ditaku, nadan napuh-ig ya nadan nabalun binabai. Mu dadagonay planun nadan gaga-ihon tatagu.
10 Dakayun iZion, pakannomnom yun hi APU DIOS di Patul ta nangamung. Hiya an Dios yu ya munnananong ta nangamung di pun-ap-apuwana.