1 Da'yun amin an tatagun wah tun luta
2 an da'yun na'ampa unu nabagtun tagu,
3 Ti nan hapito' ya bo'on hay atugunanyu ya anggay
4 ya tukalo' nan alpa ta un'u ikanta nan tugun an ipa'innila' ay da'yuh innilaonyu.
5 Adia' tuma'ot hinan gutud di atapnga' hi punli'uban nan nun'abaholan an mamuhul ay ha"in,
6 ya ta"on hi unda ehdol hinan inadangyanda ya ehngelda goh hinan ado'ol di inadangyanda
7 Ya mi'id ahan di taguh mamla' hi ataguan di ohah tagu
8 ti nabalul di pola' di ataguan nan tagu an mi'id ahan di pa"apla'
9 ta way atonan mi'taguh enggana ta adi matoy.
10 Ya inila tu'un ta"on nan tatagun nun'anomnoman ya matoy,
11 At nan lubu'da di munnonong hi abungda
12 Ya ta"on hi un adangyan ahan nan tagu mu ma'ubah damdama
13 At hiyah ne ma'at hinan tagun mangehdol hinan abalinana,
14 Ti mapogpogda an umatdah nan kalnilun mapalti an hi atoy di mangitnud ay didah lubu',
15 Mu baliwana' ay Apo Dios hinan ataya',
16 At adi ayu numanomnom hi un umadangyan nan udum
17 Ti awni ta matoyda at mi'id di ita'inda
18 Ya ta"on hi un munlenot hinan inadangyana ya gun ita"eng nan udum an tagu
19 mu matoy hiya damdaman umat hidin o'ommodna,
20 At ta"on hi un adangyan ahan nan tagu mu ma'ubah damdama