1 Apo Dios, dengngolmi nan inulgud din o'ommodmi an mun'aphod an inatmun didah
2 Ti numpakakmu ya pinaligatmu din udum an tatagun adi umunud an nunhituh nan babluy
3 Ya bo'on nan ni'pattayan din o'ommodmiy dumalat hi namoltanandah nan luta unu bo'on nan abalinanday nangabakanda
4 Ya He"ay Ali' ya Dios'u goh hi bumadang
5 ya dumalat nan nidugah an abalinam ya abakonmi nan buhulmi,
6 At adi' ehdol nan pana' ya ta"on nan hanggap'uh pamaliw'uh odol'u,
7 mu He"ay way abalinanan umabak hinan buhulmi,
8 Apo Dios, He"ay gunmi iyamlong hi abigabigat,
9 Mu ad ugwan ya din'ug da'mi ya binain da'mi
10 Ya hay inatmu ya impalayaw da'mih nan buhulmi
11 Ya inyabulutmun numpattoy da'min ay ami kalnilu,
12 Ya inla'u da'min tatagum an un nalakay pallogmi
13 At hiyanan hiwihiwitan ya inaba'abatlan da'mih nan tatagun heneggonmi
14 Ya ta"on nan wah adadagwin babluy ya un dami hinhannulon,
15 At ten unna' malulugluh abigabigat,
16 ti gun'u da'mi hiwihiwitan ya pahapahalon hinan buhulmi
17 Ya na'at hatun amin ay da'mi an ta"on unmi agguy He"a inaliwan
18 Hay nomnommi ya agguymi He"a din'ug,
19 Mu pinaligat da'mi,
20 Gulat ta naliwanmi an mundayaw ay He"an Diosmi
21 ya undan udot hene ya adim innilaon an Dios
22 Mu dumalat nan pangunudanmin He"a ya waday gun mapatoy hi abigabigat
23 At ihi'almu ni', Apo Dios, ta baliwan da'mi!
24 Ya paddungnay un da'mi ipo"oyan,
25 Paddungnay un ami natu"in hinan luta
26 At badangan ni' ahan da'mi