1 O Apu, adia' ni' ihingal unu titildon hinan bumungtam
2 ti paddungnay pinanaa' ya tinubli'a'.
3 Ya dumalat nan bungotmu ya ten nidugah di dogoh'u,
4 ti nidugah ahan an umat hinan ma'addamot an adia' pa'appi'ug.
5 Ya nalipuh tun odol'uh pogha,
6 Ya ten unna' pumi"upi"ut'ut hi ha'itna,
7 ya ten nidugah an munha'it di bonog'u
8 Ya ten mangluya' ahan an mid am'amungit hi bi'ah'u,
9 Apo Dios, inilam an amin di wah nomnom'u,
10 ya umob'o'ob'ob di puhu',
11 Ya dumalat heten dogoh'u ya adia' idungaw hinan liligwa' ya nan ni'tunglub'u ti tuma'otda.
12 Ya hanan mamhod an mamatoy ay ha"in ya inyammaday pamitudan ha"in,
13 Mu unna' ay napu'it an adi' donglon nan pana'ta'atotdan ha"in,
14 Ti onaynah un'u adi donglon ya tabolon di alyondan ha"in.
15 Mu He"ay pundenola', Apo Dios,
16 Ti hay inluwalu' ya inali' di,
17 Ya ten paddungnay matu"ina' ti ten adi duminong nan ligat'u,
18 at itutuyu' tun bahol'u ti hiyay mangipaligligat ay ha"in.
19 Ya do'ol nan mun'abi'ah an buhul'un mamohol ay ha"in
20 ti ta"on un maphod di inat'u mu nappuhiy pamallohda ti nan nahamad di ato'.
21 Apo Dios, adia' ni' ahan inganuy,
22 at punnaudom ni' an mamadang ay ha"in, O Apu an Baliw'u!