1 Adi ayu numanomnom an dumalat nan nappuhin pangat nan tatagu,
2 ti umatdah nan holo' an ag'aga ya nun'alyawda ya nalanguda,
3 Ehdolyuh Apu tu'u ta atonyuy maphod,
4 Atonyu nan pohdon Apo Dios,
5 An amin di atonyu ya eyokodyun Apo Dios,
6 At nan anahamadyu ya nan pamapaddunganyun mumpanuh di attigan di amaphodyu
7 At anuhanyu, ya e'kodyun amin ay Apo Dios,
8 Ya adi ayu bumubungot,
9 ti nan mangamangat hi nappuhi ya mapogpogda,
10 Ya hanan nappuhiy pangatda ya adi madnoy at mun'a'ubahda,
11 Mu nan ma'uya di mamnoh hinan luta,
12 Ti nan munnomnom hi nappuhih atonah nan maphod di pangatna,
13 ya abatlan Apo Dios dida ti inilanan adi madnoy at mamoltada.
14 Nan tagun agguy kimmulug an gun mangat hi nappuhi ya nun'idadaanday hanggapda ya panada
15 Mu diday mapatoy hinan hanggapda,
16 Nabalbalul nan itang an gina'un nan nahamad di ugalina
17 ti nan abalinan nan nun'appuhiy ugalida ya ma'ubah,
18 Ya inilan Apo Dios nan un'unnud ay Hiya,
19 Ti mahalimunandah nan gutud di way punligatan,
20 Mu nan nappuhiy ugalida ya ma'ubahda,
21 Nan nappuhiy ugalida ya umutangda ya adida bayadan,
22 Ya an amin nan tatagun wagahan Apo Dios ya diday mamnoh hinan luta,
23 Mun'am'amlong hi Apo Dios an manalimun hinan tatagun nahamad di pangulugdan Hiya,
24 at ta"on hi un waday topong ay dida
25 Nete"ah din a'unga' ta nangamung ad ugwan an nala'aya'
26 Ti diday gun omehmo' hinan udumnan tatagu an dumalat hi awagahan nan imbabaluyda.
27 At du'gonyu nan nappuhin gunyu aton ta nan maphod di atonyu
28 ti pa'appohpohdon Apo Dios nan tagun nepto' di pangatna,
29 At nan nahamad di ugaliday mamnoh hinan luta ta hidiy punhituwandah enggana.
30 Nan nahamad di ugalidan tatagu ya tumugun di hapitonda,
31 Ya nunnonong hi nomnomda nan Tugun Apo Dios,
32 Nan nappuhiy ugalida ya gunda bota'on nan tatagun nahamad di ugalida
33 Mu wagwadah Apo Dios ay dida,
34 Gunyu ehdol hi Apo Dios,
35 Hinamad'un tinnig nan adi mangngol an tagu ya nan nappuhiy ugalina
36 mu agguy nadnoy ya natoy an na'ubah ti pun'anap'u,
37 At tigonyu adya nan aat di tagun nahamad di ugalina ya nan adi munlayah
38 mu an amin nan mumbahol ya mun'atoyda,
39 Baliwan Apo Dios nan tatagun nahamad di ugalida,
40 Ya badangana goh didah nan nappuhin aton nan nun'appuhiy ugalidan tatagu ay dida,