1 Pa'appohpohdo' He"a, Apo Dios, an nangidat hi bi'ah'u!
2 Hi Apo Dios ya ay batun nahamad hi ipo"oya' ta mabaliwana'.
3 At hi Apo Dios an nahamad hi madayaw di numpabadanga',
4 Ti hidin hi'ihi'itangan ataya' ya paddungnay unna' inloblob hinan do'ol an puma"i,
5 ya paddungna goh di tali an nibobod ay ha"in
6 At gapuh nan nidugah ahan an numanomnoma' ya numpahpahmo'a' ay Apo Dios,
7 Ya gapuh boholnah nan buhul'u ya immalyog tun luta,
8 At paddungnay mun'ahu' di olongna,
9 Ya piniwa'nad daya ta nun'ohop an inggatinah nan ma"ang'angingitit an bunut.
10 At nilugan hinan muntadyapan an cherubim an pun'iyaddib di mabi'ah an tuyup.
11 An nale'woh di odolnah nan ma"ang'angitit an bunut an napnuh udan.
12 Mu dumalat nan nidugah an humiliana ya nidugah an umanilat,
13 Hiya an na'abbagbagtun Dios ya hay oha goh hi umatan di bungotna ya ay idul,
14 at nun'ipalayawna nan buhul an dumalat hinan ilat an paddungnay nun'ipananan dida.
15 Ya namaganan nan baybay ta ma"attig di dopona,
16 Ya ta"on un wad abuniyan ya paddungnay nunluung ta ginuyuda' hinan bunol di danum.
17 Ta binaliwana' ay Hiyah nan mun'abi'ah ya nan ma'abohhol an buhul'u an nidugah di abalinanda ya un ha"in.
18 Ti hidin gutud di nunligligata' ya immaliday buhul,
19 Ya manu ay binadangana' ya binaliwana' ay Hiyah nan atata'ot an ma'at ay ha"in
20 Ti miyunnudan hinan nahamad ya maphod an pangat'uy inatnan ha"in
21 ti inunud'u nan Tuguna an agguy'u inat nan nappuhi ta agguy'u din'ug Hiya.
22 Ya an amin din inyuldina ya immannung an inunud'u an agguy'u nginohoy,
23 ya inilanan mi'id di numbahola' ay Hiya.
24 At hiyanan indatna an Dios di lagbu' an miyunnudan hinan nepto' an aat'u
25 Ti minaynayun di pangipapto' Apo Dios hinan tatagun mangedenol ay Hiyah enggana,
26 Ti nahamad di atonah nan maphod di ugalina,
27 Ya nan mumpa'ampa ya baliwana,
28 Ya nipaddung hi Apo Dios hi dilag'u
29 Ya Hiya ay di bumadang ay ha"in ya abalina' an abakon nan mangubat ay ha"in,
30 At Hiyay ay hapiaw an mananin amin hinan mihi'ug ay Hiya
31 Hiya ya anggay di Ap'apu,
32 Hiyay Dios an alpuwan di bi'ah'u,
33 Ya Hiya nongkay di mangidat hi abalina' an tumagtag an umat hi amabi'ah di ulha
34 Ya idatnay abalina' an mi'gubat ta olog'un oladon di gambang an pana.
35 At hiyanan nangabakona',
36 Ya gapuh nangipapto'anan ha"in at paddungnay agguya' nihungpul hinan dalan!
37 Mu ha"in di numpamdug ay dida ta engganay un'u numpatoy didan amin.
38 At hiyanan mid mangiballoh
39 ti indatnay bi'ah'un ni'gubat ta inabak'u nan buhul'u.
40 Ya impata'otna dida ta limmayawda,
41 Ya hidin nanganapandah bumadang ay dida ya mi'id,
42 At hiyanan numpatoy'u dida an paddungnay un'u nunggumu' dida
43 At immannung an binaliwana' ay Apo Dios hinan nangohoy an tatagu
44 Ya an amin di ibaga' ya unudonda
45 ti din buhul'u ya wumogwogdan mumpangabuhu' hinan nipo"oyanda
46 At madayaw hi Apo Dios an wagwadah enggana!
47 Hiya nan Dios an mangiballoh hinan buhul'u,
48 ti binaliwana' hinan aton nan mun'abungot an buhul'u,
49 At hiyanan nan anabagtun Apo Dios di hapihapito' hinan tataguh nan abablubabluy,
50 ti nangabakona' an alin pento'na,