1 Ya intuluy Solomon an nangulgud hi nipa"el hinan imbaluynan inalinay,
2 Ya numbino'ob'on di tuma'dogana ti tuma'dog an mangayag ay da'yuh nan ata'nang an duntug
3 ya hidih nan delloh di pantaw hinan pange'wan an umuy hinan babluy,
4 Da'yun linala'i ya ta"on un da'yun ami'amin an tatagu,
5 ya namama ay da'yun nakudang di nomnomna unu manangpah,
6 Donglonyu ahan heten nahamad an tugun'u
7 Immannung an amin di alyo' ya ma"akkulug
8 An amin di hapito' ya immannung an mi'id ah nibahhawana
9 Ya inila' an nan nanomnoman ya nan nanginnila ya abulutonday alyo'
10 Hay alyo' ay da'yu ya pa'appohdonyu nan tugun'u ya un nan silver,
11 Ti nahamhamad hi Anomnoman ya un nan mapla'an an batu,
12 Ya humapit hiya, ya inalinay, Ha"in an hi Anomnoman ya ihnay mi'hitun Ha"in hi abung'u an da Pun'awat ay Panginnila,
13 Ya kulugonmi an hay pange'gonan ay Apo Dios di hiyay pamahiwan hinan nappuhin pangat,
14 Ya Ha"in di mangipanomnom hi maphod an punnomnoman ya nan maphod an tugun,
15 Ha"in di mangidat hi abalinan nan a'alih nan punhaadanda,
16 An amin di mumpapto' eten luta ya Ha"in di bumadang ay didah nan tamuda
17 At Ha"in an hi Anomnoman ya hay pohdo' ya nan immannung an mamhod ay Ha"in,
18 Ya ma"aphod nan gun mitnud ay Ha"in an da Umipa'adangyan ay Me'gonan,
19 Ya hay ato' an munwagah ay da'yu ya mapmaphod ya un nan na'ahhamad an balitu'
20 Ya hay gun'u aton ya nan na'ahhamad,
21 Ya manu ay munle'le'oda' hidi ya ta way ato' an mangidat hi ma"aphod an ataguan hinan mamhod ay Ha"in
22 Ha"in ya wagwadaa' ay Apo Dios hidin nangete"anan nuntamu
23 Ya pepento'a' tuwalih nahhun hidin hopapna ya un malmu tun luta.
24 Ha"in ya wagwadaa' tuwali ya un mawada nan baybay ya nan obob an bumuhubuhu' di danumna.
25 Ya wagwadaa' goh ya un ma'amman nan atata'nang an aduntuduntug unu nan i"ittang an dudunduntug,
26 unu nan payaw an wah tun luta, unu ta"on un nan hupu'.
27 Ya binadanga' hi Apo Dios an nunlumud daya,
28 Ya tinnig'u goh nan inatnan nangammah bunut ta inhinanad daya,
29 Ya wagwadaa' hidin nangiyammanah ihinan di baybay ta adi middum hitun luta,
30 Makulug ahan an wadaa' hinan delloh Apo Dios
31 Ya mun'am'amlonga' an dimmalat an amin hinan nunlumuwana an ta"on nan tatagu.
32 At Ha"in an hi inayun hi Anomnoman ya alyo' ay da'yun imbabaluy'u ta ihamhamadyun donglon nan itugun'u
33 Makulug an manomnoman ayuh unyu unudon nan tugun'u ta adiyu inganuy an aton.
34 Ya mawagahan nan tatagun binigat ya gunda umalih nan pantaw di abung'u ta donglona' hi unna' lumahun
35 ti nan manganap ay Ha"in ya hiyay mangah'up hinan pi'taguana,
36 Mu nan adi manganap ay Ha"in ya un hay odolnay pina"ina,