1 Ya intuluy Solomon an nangulgud hi nipa"el hinan imbaluynan inalinay,
2 Ya mahapul an ihamadmun unudon nan intugun'u ta matagu'ah maphod,
3 Ya paddungnay ihe'gotmu tun itudu' hinan galaygaymu,
4 Ya amnawam nan ay babain hi Anomnoman di ngadana,
5 ti diday mangibaliw ay he"ah nan babain hi Umilugtap di ngadana
6 Wa han ohay algaw ya indungaw'uh nan nibughul an tawan di abung'u,
7 ya waday tinnig'uh do'ol an mumpangilog an linala'in mi'id ah endamda,
8 Hiya ya ene'wanah nan nuntikkuan di kulhan neheggon hinan abung Umilugtap,
9 Hay olas ede ya munhinag an na'uy an mahdom an homelong.
10 Ya himbumagga ya nabanuhu' heden babain immuy nanamun hiya,
11 (Henen babai ya mango"ongol an humapit,
12 ti awnian wah dih nan kulha an munhood,
13 Ya unat goh tinnignah den ungan lala'i ya len'omna hiya, ya inungnguna,
14 Wadah abung'ud ugwan nan ene'nong'un dotag!
15 At hiyaat unna' limmahun an manamun he"a ti he"ay nomnomo' hi anapo',
16 Ya impaphod'un inap'apan nan olo'a' hi naginnulitan hinan mundongngol an lo'ob an nalpud Egypt,
17 ya winalhia' hinan numbino'ob'on an maphod di hunghungna!
18 At umali'a ta ilablabitan ipuhay di le'natan mumpohhodan ta mun'am'amlongta!
19 Ya adim nomnomon nan ahawa' ti mi'id hidih abungmi ti numbaat hi adagwi.
20 Ya numbalun hiyah do'ol an pihhu,
21 At henen babai ya nan ma"aphod an nanapitnay nabalbaliyan han ungan lala'i.
22 At la'tot ya na'al'alu',
23 ta engganay un matubli' hi pana ta humawang hinan puhuna,
24 At he"an imbaluy'u ya donglom tun alyo',
25 Adim ahan iyunnud nan nomnommuh pangat nan umat hinan babai,
26 Ya manu ay alyo' hene ti hiyay dimmalat hi nun'atayan nan do'ol an linala'in adi mabalin an ma'yap.
27 Ya nan abung nen babai ya paddungnay ongol an pantaw an mipluy hinan wadan din nun'atoy!”