1 Nan tagun uminum hi bumutong ta nangamung un mabutong ya la'tot ya pumihul hinan i'ibbana, ya mi'pattoy goh ay dida,
2 Nan bungot di ali ya atata'ot an umat hinan layon an humeeheel,
3 Nan tagun adi mamhod an mi'hongngel ya e'gonanda hiya,
4 Nan napayad ya adina tamuan an gaudon nan payawnah nan ahitanom,
5 Nan na'unig an nomnomon di ohan tagu ya umat hinan danum an wah nan maluhung an bubun, at adagwih how'on,
6 Nan do'ol an tatagu ya alyondah un nahamad di pumpopohhodandah nan i'ibbada,
7 Nan lala'in nahamad di pangatna ya maphod di gunna aton,
8 Wa ay ta umbun nan alih nan umbunana ta mumpanuh hinan aat nan tataguna
9 Ngadan nen tagun waday abalinana udot an mangalih,
10 Umipabohol ay Apo Dios nan mangudang hinan pungkiluna ya nan punlukudna.
11 Ta"on nan ung'ungnga ya nan pangatnay mangipa'innilah nan aatnah un nahamad unu nappuhi.
12 Nan inga an pundongol di tagu ya nan mata an pannigna
13 Mawotwot nan taguh unna pohpohdon an molmolo',
14 Munlili nan nguminah un muntawal an alyonay un nanginah nen la'uana,
15 Do'ol di nun'abalul an balitu' ya nan nun'anginan batu,
16 Mahapul an waday alanyuh gina'un nan tagun mangita'dog hinan tagun umutang ta waday pamatangna,
17 Immannung an mapolhat hi onon nan ma'an an na'alah linaylayah,
18 Nu waday nomnomom hi ma'at ya maphod hi un'a mumpatugun hinan nun'ala'eng an nanomnoman hi mahhun ta adi mibahhaw,
19 Nan ma"ulgud an tagu ya mi'id upid di hapitona,
20 Nan tagun mangidut hi ommodna ya adi madnoy di pi'taguana
21 Nan inadangyan an nalakay na'alana,
22 Adi maphod hi un way mangalih, “Iballoh'u nan inatdan nappuhin ha"in!”
23 Umipabohol ay Apo Dios nan kumuluk hi kiluan
24 Hi Apo Dios di mangipapuut hi at'aton nan tagu,
25 Atata'ot hi un nonong ya nunhapata nan tagun Apo Dios an waday idawatnan Hiya ti ini ya adi ma'at,
26 Nan nanomnoman an ali ya hamadonay tatagun mangamangat hi nappuhih pumpapto'ana
27 Hi Apo Dios ya hamadonay wah nomnom di tagu an ta"on un nan agguy nipa'innila.
28 Mi'id al'alih nan alin mumpapto' hi un makulug di pangatna an napapaddung di atonan munhumalyah nan tatagu
29 Hay amaphod di ungunga ya nan amabi'ahda,
30 Nan numbino'ob'on an pangilat di dumalat hi pumhodan di tagu ta ma'aliwan di baholna,