1 On'onayna nan tagun nawotwot mu nahamad di pangatna
2 Ta"on hi un mahmahluy tagu mu mid hulbin nan tamuna damdamah un agguy nepto' di inatnan nuntamu,
3 Immannung an nan udumnan tagu ya pa"ionday nitaguanda tuwali an dumalat nan nappuhin gunda aton,
4 Nan adangyan ya do'ol di mi'ligwan dida,
5 Nan mun'ihtigu an hay nibahhaw di ulgudonah pangihtiguna ya immannung an mamoltah pidwa,
6 Nan tagun nabagtuy haadnan mumpapto' ya do'ol di mumpabadang ay hiya,
7 Nan tagun na'agwotwot ya ta"on un nan a'agina ya adida ibilang hiyah ibada, at inyal'allana an mi'id ah ligwana!
8 Nan tagun waday pamhodnah odolna ya pohdonan ma'udman di inilana
9 Nan munlayah an mun'ihtigu ya umannung an waday amoltaana,
10 Adi midipat hi un hay nakudang di nomnomnay munhituh nan abung di ali,
11 Nan nanomnoman an tagu ya mehodan an adi mabanbannungot,
12 Umipata'ot nan bungot di ali an umat hinan layon an humeeheel,
13 Nan lala'in ommod di ungan nakudang di nomnomna ya do'ol di problemana,
14 Nan o'ommod di mangipaboltan hi abung ya an amin nan inadangyanda,
15 Nan napayad an humigan muntamu ya unda momollo',
16 Nan tagun manginaynayun an mangunud hinan Tugun Apo Dios ya immannung an halimunanay odolna,
17 Nan mangidat hi badangnah nan nawotwot an tagu ya paddungnay un hi Apo Dios di nangipa'utangana,
18 Nan o'ommod an waday imbaluyda ya mahapul an tugunonda hiyah nan gutud di a'ung'ungngana ti hiyah ne gutud an nalaklakan matuduwan
19 Nan tagun mabanbannungot ya okod hiyan munholtap hi balloh nan bumungtana
20 Nan tagun mangngol hinan mitugun ay hiya ta unudona
21 Hay tagu ya mabalin an hiyay okod an munnomnom hinan numbino'ob'on an ato'atona,
22 Hay pohpohdon nan tagu ya nan panginaynayunan nan pamhod di tatagun hiya,
23 Nan tagun hi Apo Dios di e'gonanah unudona ya hiyay way makulug hi pi'taguanah tun luta,
24 Waday udum hi tatagu an nunheglay anapayadda
25 Gilaton nan pumihupihul ta way tigon nan manangpah, at manomnomanda.
26 Umipabain nan imbaluy an mangakaw hi gina'un amana,
27 At he"an imbaluy'u ya mahapul an inaynayunmun mun'adal hinan makulug an mitugun ay he"a
28 Gulat ta layah di hapiton nan taguh pun'ihtiguana ya unna langlangkakan nan munhumalya
29 Immannung an mamolta nan pumihul,