1 Nan pambal di ma'ma'ullay an taguh un way bimmungot ya uyahonay bungotna,
2 Nan itudun nan nala'eng an tagu ya do'ol di maphod hi ma'adal hinan hapitona,
3 Hi Apo Dios ya titiggonan amin di ma'ma'at,
4 Nan umal'alu' an hapiton ya immannung an hiyay dumalat hi ataguan nan mangngol,
5 Nan ungan mamahal hinan itugun amana ya un nakudang di nomnomna,
6 Nan tagun nahamad di pangatna ya pumpumhod an amin di ato'atona an umat hinan abung an gun ma'ud'udman di numbino'ob'on an gina'unan mapla'an,
7 Nan nanomnoman an tagu ya gunna hapiton nan way ibadangnah nan i'ibbana,
8 Umipabohol goh ay Apo Dios nan e'nong nan tagun mangamangat hi nappuhi,
9 Umipabohol goh ay Apo Dios nan pangat di tagun mangamangat hi nappuhi,
10 Nan tagun nanginnilah nan nepto' an umat hinan dalan mu mihalla damdamah dalanona ya nidugah di moltana,
11 Hi Apo Dios ya adi mabalin hi un waday mili"ud ay Hiya ti inilanan amin di logom an ta"on nan aat di wadan di nun'atoy,
12 Nan mapihul an tagu ya adina pohdon an matugun,
13 Nan tagun waday amlongna ya ma'immatunan hi angahnan umeme'emeh,
14 Nan nanomnoman an tatagu ya pohdondan ma'udman nan inilada,
15 Umipalungdaya nan nitaguan nan tagun do'ol di ligatnah abigabigat,
16 Onaynay nitaguan nan tagun manghan di gina'una ya gunna e'gonan hi Apo Dios
17 Onayna goh hi un me"an nan taguh nan udumnan tagun pohpohdona an ta"on hi un halawhaw di ihdada ya anggay
18 Nan tagun mabanbannungot di dumalat hi pumpapattayan nan tatagu,
19 Nan napayad an muntamu ya immannung an do'ol di ligat hinan ataguna,
20 Nan nanomnoman an unga ya umipa'amlong ay amana,
21 Nan nakudang di nomnomna ya ma"am'amlong an mangat hinan nappuhin mi'id di hulbina,
22 Nan tagun adi mundongol hinan maphod an tugun ya mi'id di pumbalinan di ninomnomnah aton,
23 Ma"am'amlong nan tagun hay immannung di hapitonan waday ibadangnah nan mangngol
24 Hay ipaddungan nan nanomnoman an tagun mangun'unud hi aat di pi'taguan
25 Pa"ion Apo Dios di nunhituwan nan mangipabagtuh odolna,
26 Umipabohol ay Apo Dios nan punnomnoman nan tagun mangamangat hi nappuhi,
27 Nan umam'am an bumalbalih nan heneggonay dumalat hi guluh nan pamilyana,
28 Nan tagun nahamad di pangatna ya nomnomonah mahhun ya unna tabolon nan ibagadan hiya,
29 Adi ihi'al Apo Dios di luwalun nan tagun nappuhiy pangatna,
30 Nan tagun umemeh ya pa'amlongonay i'ibbana,
31 Maphod hi un abuluton nan taguy mitugun ay hiya,
32 Ya nan tagun adina pohdon an mituduwan ya un hay odolnay binalbaliyana,
33 Hay ma'at hinan tagun mange'gon ay Apo Dios ya umannung an luma'eng ta manomnoman