1 Impahapita' ay Apo Dios, at inalinay,
2 Ya ta"on un nan imbabaluyda ya umat goh ay dida ti inada'adalda
3 At hiyanan hay ato' ya ipahamham'un amin nan inadangyandah nan buhulda
4 At taynanda nan babluy an indat'un dida
5 Ya inalin goh Apo Dios di,
6 Hay ipaddunganda ya nan a'ayiw an nitanom hinan mapulun,
7 Mu mawagahan nan tagun mange'kod hi nitaguanan Ha"in an Dios,
8 at hay ipaddunganda ya nan a'ayiw an nitanom hinan neheggon hinan way ginnaw an dimmatong di lamutdah nan way danum.
9 Hay aat di nomnom di tagu ya nidugah an bumalbalih an amin hi logom
10 Mu Ha"in an Dios ya inila' di nomnomnomon di tatagu ya nan pohdondan aton.
11 Ya nan tatagun immadangyan an dumalat di kuluk
12 Ya inali' di,
13 He"a, Apo Dios, di hahalimidonmin bumadang ay da'min holag Israel,
14 At odowo' an ipaphoda' ni' ahan ay He"a, Apo Dios,
15 Nan tatagu ya nidugah di ngohoydan alyondan ha"in di,
16 Apo Dios, agguy'u ingnganuy nan tamu' an mangipapto' hinan tatagum,
17 At adia' ni' ahan pata'ton
18 At tigom ni' ahan ta nan mangipaligligat ay ha"in di pata'tom ya bainom ta bo'on ha"in,
19 Palpaliwan ya inalin goh Apo Dios ay ha"in di, “Umuy'ah nan pantaw di allup an gun pange'wan nan tatagu ya nan a'alid Judah ta tuma'dog'ah di. Ya immuy'a goh hinan udum an pantaw di allup hi ad Jerusalem.
20 Ta alyom ay diday, Ihamadyun donglon heten hinapit Apo Dios an ta"on un da'yun a'alid Judah ya da'yun amin an tatagun gun mange'wan ten pantaw di allup.
21 Ti inalinay, Ipogpogyun mungkumilduh nan way pantaw di allup ad Jerusalem hinan Habadun ngilin.
22 Ya mahapul an mi'id di ilahunyuh kalgah nan abungyu, ya mi'id di muntamu enen algaw ta ngilinonyu ti hiyah te tuwali din intugun'uh din o'ommodyu.
23 Mu agguyda inunud ti ma'angohhoyda an adida umunud ya mituduwan!
24 Mu gulat ta unudona' ay da'yu ta mi'id di mangita'in hi kalgayun maluh hinan pantaw di allup ad Jerusalem hinan Habadun ngilin ta unyuat ngilinon nongkay henen algaw
25 ya minaynayun di pun'ap'apuwan nan aliyun holag David hitud Jerusalem. At hiyanan mitakayda nan ap'apuyu ya da'yun iJudah hi kabayu ya nan kalesa. Ya makulug an mamapnuh tataguh tun ad Jerusalem hi enggana.
26 Ti umaliday tatagun malpuh nan abablubabluy ad Judah, ya ad Benjamin, ya nan nun'eheggon hi ad Jerusalem an kapitulyuda. Ya mi'yalida goh nan tatagun numpunhituh nan dudunduntug an wah immapit hi alimuhan di algaw ya ad Negev. Ta pun'iyalidah nan Timplu' di e'nongdan Onong an Moghob di udum, ya nan Onong an Ma'an, ya nan Onong hi Pangidawatan, ya nan udum an e'nongda, ya wada goh di incense hi e'nongdan Ha"in an Dios.
27 Mu gulat ta adia' nongkay unudon ta adiyu e'gonan nan Habadun ngilin, ya gun ayu mun'odon hi kalgayuh nan aluhanyuh nan pantaw di allup ad Jerusalem at gohbo' ad Jerusalem hi engganay mapu an ta"on un nan allupna. Ti mi'id di way olognan mangdop hinan apuy.”