1 Ya intuluy Apo Dios an himmapit an inalinay,
2 Ya abalinam dan an huliton di olongna,
3 Ya al'alu'on da'a dan ta hom'om hiya,
4 Hiya dan hi un mi'tulag ay he"a ta awitom
5 Ya ibilangmu dan hiyah ohah ay'ayupmun ay hamuti,
6 Pohdon dan nan mungkumeldun la'uan hiya ta paltionda
7 Ya abalinam dan an punggayang di up'upnan nahbitan,
8 Ya gulat ta dinihom hiyah mamenghan at manomnommuy aat di pumpattayan,
9 Adi ahan mabalin an madpap
10 Ya mi'id ah ohah way olognan mangihtulbun mamangon ay hiya,
11 Undan udot waday mangipadah an mungngohoy ay Ha"in hi adi mamolta?
12 Ha"in ya adi' idinong an gun manapihapit hi aat di umatan nan leviathan,
13 Ya mi'id ah ohah way abalinanan munlalat hinan up'upna
14 Wada dan di mabalin an umuy mana'ang hinan pangalna?
15 Nan lahip di bonogna ya nalu"ilu"ip,
16 Danen lahip ya nihamad di nalu"ilu"ipanda,
17 Nihamad di nalu"ilu"ipan di nundada"itanda,
18 Ya wa ay ta huma'ti ya waday bumuhu' hi olongnan mun'elat,
19 Ya gun munggeladaw nan apuy an bumuhu' hi timidna,
20 ya gun bumuhu' di ahu' hi olongna
21 Ya nan hodohdana ya ipabalana nan uleng,
22 Ya nidugah an mabi'ah di bagangna,
23 Ya ma'odhol an amin di lamohna
24 ya ma'odhol di puhuna
25 Ya wa ay ta bumangon ya tuma'otdan amin nan waday nidugah di abalinana,
26 Nan hanggap an pamagitdan hiya ya un mede'leh,
27 Nan leviathan ya ibilangnan ay dagami nan gumo',
28 Hiya ya adina elan nan me'nan pana,
29 Adina goh ma'elan nan pang'ul an ibilangnah umat hinan ohan dagami,
30 Ya nan lahip hi putuna ya mun'atadom an umat hinan tadom di naphal an alewahhang,
31 Ya ipaluwagna nan danum hi baybay an umat hinan nihaang hi banga,
32 Ya humilin umupag nan baybay an alauhana,
33 Ya mi'id ah ohah nalmuh tun lutah nipaddung ay hiya
34 Ya an amin nan nun'abagtun animal hitun luta ya hay pannignan dida ya na'ampada,