1 Ya innaynayun Job an himmapit an inalinay,
2 “Immannung an ihapata' ay Apo Dios an adi matmattoy
3 Mu heten atagu' hi engganah unna' matoy
4 ya adi' ahan hapiton di nappuhi,
5 Ya ta"on hi un ngadan di atonyu ya adi' damdama alyon hi un ayu makulug,
6 Ya halimuna' nan amakulug'u,
7 Hay maphod ni' ya mun'amoltada nan mi'buhul ya nan mamahapahal ay ha"in
8 Hay namnamaon nin nan adi mangulug ay Apo Dios
9 Undan donglon udot Apo Dios nan kilada
10 Undan mabalin hi unda mi'yam'amlong ay Apo Dios an nidugah di abalinana?
11 At ihamadyun donglon ta itudu' di aat nan nidugah an abalinan Apo Dios,
12 Mu hatun na'at ya hinamadyun tinnig an amin,
13 Hiyah te indadaan Apo Dios hi moltan nan gun mangat hi nappuhi
14 Ta"on un dumo'ol di holagda ya mun'atoyda damdamah
15 Ya nan ma'angang an adi matoy ya mun'atoyda damdaman dumalat nan naligat an dogoh,
16 Ya nan nun'abaholan an gun mangat hi nappuhi ya manu ti adadangyanda
17 mu la'tot ya nan nahamad di ugaliday mangilubung hinah nan lubungda,
18 Ya nan abung an nunhituwan nan nun'abaholan
19 Ya henen gutud di nolo'anda ya adangyanda,
20 Mawaday atata'ot hi holholtaponda
21 At nan puo' an malpuh buhu'an di algaw ya pun'iyaddibna dida,
22 Ya ta"on hi unda ilulud an mamaliw hi odolda
23 At nan puo' ya mabi'ah an gun mun'apalin mipyud ay dida