1 Ot Alyon Job di,
2 Manu te nala'ing ayu nayya te himmapit ayu'e on donglon da'yuh tatagu.
3 Mu ha"on ya umata' bo damdama i da'yu an waday nomnom'u ta adiyu alyon hi ma''id ha innila'.
4 Numbalina' mo tayya hi ngihngihilan nadan ibba' an ta'on on maphod di pangat'u ya ma''id ha bahul'u.
5 Mu gapu ta malinggopda ya pihulonda nadan maligligatan.
6 Ya hanada'en mumpangako ya nadan mangmangngat hi umipabungot i Apu Dios an hay abalinanday pumbalinondah diosda ya diday malinggop di nitaguwanda.
7 Mu hi'on pinhodyun ma'awatan di a'at di nitaguwan ya nomnomnomonyu nadan animal ya nadan hamuti ot waday ma'adalyuh nan a'atda.
8 Ya atbohdih nadan mungkaddapan hitun luta ya nadan wah nan baybay an waday ma'adalyun dida.
9 Te an naminda ya innilada an hi Apu Dios di nunlumun dida.
10 Ya hiyay nangdon hi nitaguwan di an namin an limmuna an ta'on on hay tagu.
11 Ya hiyay nangapyah inga ta pangngol hinan ibagadan immannung onu nihalla.
12 Hanadan nanomnoman ya nadan na'amamma ya innilada nan maphod ya nan nalawa.
13 Mu ta'on on athidi ya ma"id ha nipaddungan di la'ing ya abalinan Apu Dios.
14 Te onha waha dadagona ot ma"id ha taguh abalinanan ipaphod.
15 Ya onha adi ipa'alin Apu Dios di udan ot mamaganan tun luta.
16 Hi Apu Dios ya ongal di abalinana an mangat hinan pohdonan aton.
17 Ya abalinanan pumbalinon nadan nala'ing an mun'ap'apu hi ma"id ha innilada.
18 Ya abalinana bon aanon nadan patul hinan sa'adda ya numbalinona didah himbut.
19 Ya abalinanan ipa'aan nadan padi hinan punhilbiyanda.
20 Ya abalinana bon pumbalinon nadan nala'ing an muntugun hi ma''id ha innilada an ta'on on diday piyalon di tatagu.
21 Ya abalinana bon padngolan nadan ap'apu.
22 Ya abalinanan papatalon di munhihillong an ta'on on hinan munhihillong an awadan di numpun'ate.
23 Ya abalinana bon pakadangyanon di ohan boble ta mundongol.
24 Ya abalinana bon pa"ihon di punnomnom nadan ap'apuh tun luta ya inwalongna dida ta aggeda innilay atonda ta eda humanawhawwangan.
25 Ta ayda napilok an umanap'apu'apda ya ayda nabutong an mundukkingan.