1 Anduane Homogohanda Peduele igini Yoelehondo bi ogodagua lamini.
2 Wali agali wahe kamiru-o tí hale hadaba.
3 O biraruninaga tígua tínaga waneiginiru lamilimu.
4 Pagaya ale dewaoreme tidi yalu ibalu mbirale yuni damenego bibahende naiore hene.
5 Agali lulu iba nowa lulu yu haga kamiru-o ai heyu howa dugu bidaba.
6 Pagaya ale tidini dewaore ami agali ibiradagua ibalu inanaga dindi nahandabeheore dambi ho wa kagoni.
7 Tigua inanaga pu mbira lini daga mini gerebi irane mo ko halu pogebi bibahende naiore hayagoni.
8 Wandarime igiri ibu poleore lalu lawinigo homaragola dara timbuniore halu dugu biagadaguaore dugu biai hadaba.
9 Lomabu mulene tomobi waini ibabi nawida.
10 Mabuha mbirale mbira nahe bameore dindi hangu ngagoni.
11 Agali mabuha biabe bialu e hangaga kamiru-o dara holene nga.
12 Pu mbira lini daga mini gerebibi pogebi bibahende gau lai hayada.
13 Loma binigo mo miagaru-o tí lomabu mulene dabu biabe biaga kamiru-o tígua yayawi dindi dugu hiruwa dara halu dugu bidaba.
14 Tígua wali agali lamialu agali haguane karubi Yuda wali agali karubi bibahendeme tomo nane wahalu tí bibahende Anduane Homogo tínaga Ngode Datagaliwabenaga andaha mo ngoai howa ibuhondo bi lalu dugu bialu holene nga.
15 Anduane Homogo ibugua Horo ibunaga pongobo winigo áyu kaware ibiragonaga aniore bulene nga.
16 Tomo mbirale ngaru mo koore harago hondowa iname mbirale mbira bibe nahe kamagoni.
17 Dindiha yobi iba nabere ngagome tomo egeneru hengederia anda naholebira.
18 Nogo bulumaga karu tibi nde datani nolene nahedagola ha̱a̱ lama lulu yalu ibaga bialu ka.
19 Anduane Homogo-o ira datani karubi bibahende irame bo daradagua bialu gau lai hayadagonaga i̱na í̠ olarogo.
20 Ainde datani karubi gau lai halu iba bedarubi hundiai hayagola ema bialu piaga karume í̠hondo dugu bu ngialu kagoni.