1 याहवेहजी धबै मोशाने बिइ, “क्हि हारून, नादाब, अबिहू नेरो इस्राएलर्बै चिब्मैं न्होंर्बै ङिच्यु चिब्मैं कों क्रेसि ङ ङाँर खो, धै ह्रेंगोउँइँलेन् क्र कुरसि ङलाइ फ्योद्।
2 दिलेया मोशा मत्त्रे ङ ङाँर खल् त्हुम्, अरू चिब्मैं ङ ङाँर आखो, धै अरू म्हिमैंइ कोंर प्हले या आम्हैरिगे।”
3 मोशा ह्यासि याहवेहजी बिबै ताँमैं नेरो लल् त्हुबै ठिममैं म्हिमैंने बिमिंमा चमैं ताँनइ सुँ घ्रिले, “याहवेहजी बिबै ताँन् ताँमैं ङि लब्मुँ,” बिइ।
4 झाइले मोशाइ याहवेहए ताँन् ताँमैं प्ह्रिइ। धै प्हँन्हाँग्धों न्हाँकर्न रेसि मोशाइ कोंए जरर ख्रो पिंबै क्ल्ह्यो घ्रि बनेसि चर इस्राएलए कुल घ्रि-घ्रि ल्हागिर घ्रि-घ्रि लसि च्युसे ङ्हिं युँमा क्योइ।
5 च लिउँइँ मोशाइ इस्राएलर्बै फ्रेसिमैं कुलइ, धै चमैंइ याहवेहए मिंर मिइ ख्रोंबै ख्रोमैं नेरो क्ह्रिमिंबै ल्हागिर क्ल्या साँढेमैं ख्रो पिंइ।
6 च खेदोमैंए ङ्हिबाँर्बै तिबाँ को मोशाइ भाँडोर झोंइ, धै तिबाँ को ख्रो पिंबै क्ल्ह्योर प्रामिंइ।
7 च लिउँइँ मोशाइ याहवेहजी ल्हैदिबै ताँ प्ह्रिबै कितब किंसि म्हिमैंए उँइँर थेबै कैले खेमिंमा “याहवेहजी ल्हैदिबै ताँन् ताँमैं ङिं लब्मुँ,” बिसि चमैंइ बिइ।
8 च लिउँइँ मोशाइ भाँडोर्बै को किंसि म्हिमैं फिर प्रासि बिइ, “थेद्, चु याहवेहजी बाछा फैबै को ग। खीजी चु बाछा खीजी ताँन् ताँमैं बिब् धोंले क्हेमैंने फैइमुँ।”
9 च लिउँइँ मोशा, हारून, नादाब, अबिहू नेरो इस्राएलर्बै चिब्मैं न्होंर्बै ङिच्यु चिब्मैं कोंर क्रेसि
10 इस्राएलए परमेश्वरलाइ म्रोंइ। खीए प्हले न्होंर निरइ स्युबै मु धोंबै छ्याँबै युँमा प्लना मुँल।
11 दिलेया परमेश्वरजी इस्राएलर्बै चिब्मैंए न्होह्रों आल। चमैंइ परमेश्वरलाइ म्रोंइ धै बालुन् चब् थुँब् लइ।
12 याहवेहजी मोशाने बिइ, “कोंर ङ ङाँर खसि टिद्। क्हिइ म्हिमैंलाइ लोमिंरिगे बिसि ङइ ठिम नेरो लल् त्हुबै ताँमैं युँमाए प्लनार प्ह्रिइमुँ। च युँमा क्हिलाइ पिंब्मुँ।”
13 छबिमा मोशा नेरो चलाइ ल्होबै यहूशू रेसि परमेश्वरए पबित्र कोंर ह्याइ।
14 मोशाइ च चिब्मैंने बिइ, “ङि एसि आयुन् समा ङिलाइ चुर्न प्रेंरिद्। हारून नेरो हुर क्हेमैंनेन् तब्मुँ। खाबलैया तोइ ताँ आक्ह्रिस्याँ चमैं ङाँर ह्याद्।”
15 छ बिसि मोशा सिनै कोंर ह्यामा न्हाँम्स्योइ कों हुवाइ।
16 याहवेहए चारबै ह्वे सिनै कोंर चारइ। ट्हुगैं समा न्हाँम्स्योइ कों हुवाइ, धै ङिगैंर याहवेहजी न्हाँम्स्यो न्होंउँइँले मोशालाइ हुइ।
17 इस्राएलीमैंइ कोंए च्होर ङ्ह्योमा याहवेहए ह्वे लुँरिबै मि धों तब् म्रोंल।
18 मोशा न्हाँम्स्यो न्होंउँइँले कोंर ह्याइ, धै प्लिच्यु त्हिंइ प्लिच्यु म्हुँइँस चर टिइ।