1 Moakere Omonene ng’a mbuya mono, ekiagera ere nomuya,
2 Abanto abw’Omonene abooretie tiga bakwane igo,
3 Obasangereirie obarentire korwa ase chinse ao ao,
4 Abanto abwo nigo babete bakona goetanana ase erooro enyomo,
5 Nigo babete n’enchara amo n’erang’o
6 Erio bakarera ase Omonene ase engencho y’emechando yaabo,
7 Akabaraa ase enchera endonge,
8 Tiga abanto baakere Omonene ng’a mbuya mono
9 Omonene nigo agoisanekia oyore n’erang’o,
10 Abanto nigo bamenyete ase omosunte na ase ekiriri ki’amakweri,
11 ekiagera bangete koigwera ring’ana ria Nyasae,
12 Agakanya chinkoro chiabo ase okobaa obokong’u,
13 Erio bakarera ase Omonene ase engencho y’emechando yaabo,
14 Akabarusia korwa ase omosunte ekerima,
15 Tiga baakere Omonene ng’a mbuya mono
16 Ere nigo abunete ebisiekero bie chitaai,
17 Abande bakariria, ekiagera babwatetie enchera y’ogosareka,
18 Kera endagera ekaba enguundo ase bare,
19 Erio bakarera ase Omonene ase engencho y’emechando yaabo,
20 Akabatomera ring’ana riaye, akabagwenia,
21 Tiga baakere Omonene ng’a mbuya mono
22 Tiga barue ebing’wanso bi’ogoaka ng’a mbuya mono,
23 Abwo bageendete ne chimeeri ase enyancha,
24 mbaarooche ogokora kw’Omonene,
25 Ere agachiika ekembugu‐mbugu gekaimoka,
26 Emerindo eyio ekaimokerera igoro, naende ekairana inse,
27 Bakaba bakoong’anya na gotabataba buna abanto batiindire,
28 Erio bakarera ase Omonene ase engencho y’emechando yaabo,
29 Agachiika ekembugu‐mbugu keria, kegakira‐kiri,
30 Erio bakaba n’omogooko, ekiagera banyorete obotoereru,
31 Tiga baakere Omonene ng’a mbuya mono,
32 Tiga baabake Omonene agwo ase omosangererekano bw’ abanto,
33 Omonene akaonchora chindooche chikaba erooro,
34 Akaonchora n’ense ere entobu ekaba ekerubo ki’omonyo,
35 Boigo akaonchora erooro ekaba ritibo riichire amaache,
36 Aroro agwo nigo arentete abanto bare n’enchara;
37 Barabwo nigo bakobusura emegondo, naende basimeka emesabibu,
38 Omonene akabasesenia bagasarara mono,
39 Ekero bakeetigwe na kworoba
40 Omonene agachaaya abanene baria babachaandete,
41 Korende ere nigo akorusia abaremeire korwa ase emechando,
42 Abanyaboronge nigo bakorora amang’ana ayio na bagooka mono;
43 Omonto onde bwensi ore omong’aini, tiga aigwe amang’ana aya,