1 Erio Ayubu akairaneria, agateeba:
2 Onye ndiria obororo bwane bwarenge korengwa,
3 Ebio nigo biare ebirito kobua omokenye ore ase enyancha;
4 Nyasae Omonguru ombetire chinsara chiaye,
5 Inee! Etigere y’orosana nkwana ere, ekero egotakuna obonyansi?
6 Onye endagera tebekiri omonyoo okoyiansia, neriegwe?
7 Chindagera echio omoyo one ochiangire,
8 Naki nanga yaba buya onye nanyora aya nkobooria,
9 Nigo nganetie Nyasae anche ang’ake ansegenye,
10 Ayio nigo are kogera ndemigwe;
11 Chinguru chiane inki chiisaine imbe nokoganya kore nogosemeria?
12 Inee! Chinguru chiane nigo chire chinkong’u buna echi’amagena?
13 Ekeene gokonywa konde gwonsi tikori ime yane,
14 Oyotakororera omosani oye amaabera oyio, rirorio otigire koiroka Omobui.
15 Abaminto bakorire obong’ainereria babeire buna chintuboka chi’amaache,
16 Barabwo nigo banga buna chindooche chiamerire amaache ’obokendu abwataine,
17 Ekero ki’omobaso chiasunkera chiakea;
18 Abagendi babwate chitugo chiabo nigo bakogobera korigia amaache,
19 Abagendi ba Tema nigo bakoriga‐rigia amaache,
20 Abwo nigo bagoichana, ekiagera tibanyorete eki basemeretie;
21 Nabogio nainwe mwabeire ase ’nde buna chintuboka chiria;
22 Inee! Inche nateebirie onde ng’a andetere ekeegwa?
23 Gose nateebirie onde ng’a antoorie korwa ase okoboko kw’omobisa one?
24 Inyorokererie, na inche ninkire‐kiri
25 Naki amang’ana ’ekeene agwansa!
26 Inee! Nigo mokorengereria ng’a amang’ana ’omonto bwerusirie moyo nigo anga buna omwaga?
27 Onye naboigo, rirorio monyare goaka obomera igoro ye chintakana,
28 Bono, komoranche mondigererie;
29 Nabasoroire, irana, timobaisa gokora ing’ana rinde riibe.
30 Inee! Amang’ana aane ngokwana nay’oborimo?