1 'Arandua voi nda'u ndojapukai avi 'rã ri?
2 Mba'eta oĩ 'rã yvyty yvateve va'e áry,
3 tetã kora rokẽ py nhavaẽ'i javya py,
4 Ha'e vy aipoe'i 'rã: “Xee voi aĩ peẽ avakue roenoĩ ainya py,
5 Ha'e gui pene'arandu e'ỹ'i va'e,
6 Mba'emo iporã va'e re xeayvu rã pendu pota ke.
7 Mba'eta xeayvua ma anhetẽ meme,
8 Xee aipoa'ea ma anhetẽ ete va'e meme.
9 Oendu kuaa va'e pe ma anhetẽ va'e meme,
10 Prata 'rãgue py pejopy ke rombo'ea,
11 Mba'eta 'arandua ma ita ovareve va'e gui iporãve va'e,
12 Xee 'Arandua ma peiko kuaa aguã rupi aĩ.
13 Senhor renonde ojererokyjea rupi oiko va'e ma ojou vai 'rã teko vai.
14 Xegui ae 'rã pendu penemongetaa ha'e 'arandua anhetẽ ete va'e.
15 Xegui ae huvixave kuery opena kuaa,
16 Xegui ma joguerekoa kuery opena kuaa 'rã,
17 Xee ma ayvu 'rã xerayvu va'e kuery,
18 Xereve vy 'rã pejou mba'emo porã, ha'e omboetepy peiko,
19 Mba'emo xee areko va'e ma ouro gui ovareve ete, ouro oiky'a'o pyre
20 Xee ma tape teko porã rupi anho aiko va'e,
21 ha'e rami vy xerayvu va'e kuery pe ame'ẽ aguã iporã va'e,
22 Senhor mba'emo omoingo ypy'i guive xee ma voi xerereko,
23 Yma voi xemoĩ, jypy'i ete guive,
24 Ye'ẽ oiko e'ỹ mbove voi xee aiko ae ma va'ekue,
25 Yvyty onhono e'ỹ mbove,
26 Ha'e va'e jave py ma yvy ha'e nhuũndy nomoingoi teri,
27 Ha'e gui yva hendarã py omoĩ jave xee aĩ ae ma,
28 Yva re arai omoĩ jave py xee aĩ ae ma,
29 ye'ẽ remberã oa'anga jave voi
30 ha'e va'e jave py ma xee aĩ ae ma hexeve, ha'e oipota va'e apoarã.
31 Xee arovy'a va'ekue yvy tekoarã ojapo va'ekue,
32 Aỹ ma xera'y kuery, pendu ke.
33 Pendu ke xee rombo'ea pene'arandu aguã,
34 Ovy'a ete 'rã xenhe'ẽ rendu va'e,
35 Mba'eta xejou va'e ojou avi 'rã tekove,
36 Ha'e rã xerovai ojejavy va'e ma onhe'ẽ pe ae ojapo vai.