1 Ava omongetaa riae teĩ inhakã ratã va'e pe ma
2 Heko porã va'e heta-etave ramo heta va'e kuery ovy'a 'rã,
3 Ava hi'arandu va'e ombovy'a 'rã nguu,
4 Huvixa heko porã va'e opena porã 'rã yvy re,
5 Ava ojea katy'igua oguerorya rupi rive oiko va'e ma
6 Heko vai va'e ojejavya py oĩ nhuã imbo'aarã,
7 Heko porã va'e oikuaa pota 'rã iporiaukue'i re,
8 Avakue porojojai rei va'e ojapo 'rã tetã ha'e javi rupigua joguero'a aguã rami,
9 Heko vai va'e pe hi'arandu va'e ijayvu ramo
10 Jouguy moẽaty kuery nda'ija'ei 'rã anhetẽ rupi ipy'a va'e re,
11 Heko vai va'e oexa ukapa rei 'rã opoxya,
12 Ayvu anhetẽ e'ỹ va'e re rive huvixa ojapyxaka ramo
13 Iporiaukue'i ha'e imbojexavaiare pe joo ramigua oiko,
14 Iporiaukue'i re huvixa ha'evea rami oikuaa pota va'e
15 Yvyra rovi'i py 'rã nhanhomo'arandu, oikuaa aguã,
16 Heko vai va'e hetave ovy ramo teko vai voi hetave 'rã ovy,
17 Emo'arandu ke ndera'y kuery, ha'e ramo nembovy'a 'rã,
18 Profeta ayvu nonhendui rã heta va'e kuery opa marã rei 'rã ikuai,
19 Tembiguai ma nomo'aranduai 'rã ayvu py rive,
20 Rexa ma pa peteĩ ava oikuaa pota e'ỹ re ijayvu va'e?
21 Nerembiguai kuery kyrĩ'i guive rerory rive rire
22 Ivai ja rei va'e ojapo 'rã joguero'apa rei aguã rami,
23 Onhemboyvate va'e omo'yvyĩ'iave 'rã,
24 Imonda va'e re onhemoirũ va'e ma onhe'ẽ re ae nda'ija'ei,
25 Avakue gui okyjea rupi rive ikuai va'e ojejopy uka 'rã nhuã py,
26 Heta 'rã ikuai huvixa ojou porãa aguã rive onhea'ã va'e,
27 Heko porã va'e pe rã heko vai va'e ma ojeguarupy,