1 — Ha'e nunga re xema'endu'a vy xekuraxõ oryryi rei,
2 Pendu pota ke Nhanderuete guigua yapu re,
3 Yva guy ha'e javi rupi gui omondouka 'rã
4 Ha'e va'e rire ijayvu atã nhendu 'rã,
5 Nhanderuete ijayvu reve hyapu 'rã nhomondyipaa rupi.
6 Mba'eta yro'y apĩ pe aipoe'i 'rã: “He'a ke yvy áry”,
7 Ha'e rami vy ojapo 'rã avakue ha'e javi po oĩ rive aguã rami,
8 Vixo ikuai va'e voi oike 'rã onhemiaty py,
9 Yvytu jere oẽ 'rã ouvy opy ja'o oĩaty gui,
10 Nhanderuete oipejua py rive ho'a 'rã yro'y,
11 Arai ana overa va'e oua ma
12 Ha'e ramo arai ikuai va'e omondouka rã
13 Ha'e nunga ha'e javi ombou 'rã yvy regua kuery re oma'ẽ vy,
14 — Jó, ejapyxaka pota na pova'e re,
15 Ndee reikuaa teve marã rami pa Nhanderuete ojapo
16 Omombe'ua teve ndevy arai ikuai va'e marã rami pa yvate rupi ova-ova,
17 — Mava'e tu ojapo ndeao raku-a rendu aguã rami
18 Hexeve voi teve ndee yva reipyo kuaa avi yvate rupi,
19 Orembo'e ha'vy ore voi ixupe oreayvu kuaa avi aguã.
20 Amongue nda'u ixupe omombe'u 'rã xeayvuague?
21 — Ma'ẽ, avakue ma yva re kuaray rexakãa re noma'ẽ mbaraetei 'rã,
22 Kuaray apu'a'ia katy gui hexakã 'rã ouvy iju va'e,
23 Ipo'akapa va'e ma ndajaeko upityi 'rã.
24 Ha'e rami rã henonde avakue ojererokyje 'rã.