1 “!Ka soadoua na Taovia, rongona aia e dou;
2 Pipi gamu sui aia e maurisigamu nogo
3 me adivisugamu talu tana vera tavosi,
4 Visana vidamui ara sarevo bamai lê tana kaomate i tana e tau liu bâ sa sautu,
5 Igira ara vatsangia na vitoa ma na marou
6 Mi laona niqira rota migira ara tû mara ngangaidato vania na Taovia,
7 Maia e idagana sautu vanigira mara gini liu tana sautu goto,
8 Niqira aqo nomoa igira kara soadoua na Taovia tana rongona nina galuve vo oli,
9 Aia e naua mara vatsa na inu igira ara marou,
10 Visana e pono saikesa na tobaqira mara totu moa tana rodo,
11 rongona ara petsakoe mara tau ngaoa na muriana nina ketsa na God Susuliga Sosongo,
12 Ara aqo kakai me gini maluku sosongo na koniqira;
13 Mi laona niqira rota loki vaga ia, migira ara tû mara ngangaidato vania na Taovia,
14 Me adirutsumigira tania na totu ponotoba sosongo ma na totu tana rodo,
15 Niqira aqo nomoa igira kara soadoua na Taovia tana rongona nina galuve vo oli,
16 Aia e taitapaligira na matsapa ara aqosiginigira na tapalamila,
17 Visana ara bule, mara rota tana rongona niqira sasi ara naua,
18 me sibi na tobaqira na ganiana na mutsa
19 Mi laona niqira rota loki vaga ia, migira ara tû mara ngangaidato vania na Taovia,
20 Maia e goko moa, migira ara gini susuliga visutugua,
21 Ma niqira aqo nomoa kara soadoua na Taovia tana rongona nina galuve vo oli,
22 Ma niqira aqo goto kara soadoua kolua niqira savori-kodoputsa,
23 Mara visana ara aqo tana vaka mara liu bamai i mao
24 Mara reigira na omea na Taovia e naugira,
25 Aia e goko moa, me mai na guguri loki
26 Ma na vaka ara tsoni tana panu mara dato i gotu,
27 Mara tapulepule bamai vaga moa ti ara inu bule,
28 Mi laona niqira rota loki vaga ia ara ngangaidato vania na Taovia,
29 E pukalia na susuligana na legai loki,
30 Ara gini mage loki rongona e beata tugua na tasi,
31 Ma niqira aqo nomoa igira kara soadoua na Taovia tana rongona nina galuve vo oli,
32 Ma niqira aqo goto kara katevulagia gana loki tsapakae i laona niqira saikolu na tinoni,
33 Na Taovia e naua, ma na ko loki ara tavongani mamatsa lê,
34 Aia e olia na kao lakataga me gini lia na kaomate,
35 Aia e olia na kaomate mara maodato na kô i konina,
36 Aia e tamivanigira igira ara vitoa kara ba totu i tana,
37 Ara aqoa niqira uta, mara tsukâ niqira itai na uaeni,
38 Aia e vangalaka sosongo vanigira nina tinoni, migira ara tamanina e danga na daleqira;
39 Mi kalina igira gaqira gala ara tuliusigira nina tinoni God mara paluvangamaqira,
40 mi tana, ma na Taovia e tû me pea sosongoligira gaqira ida igira gaqira gala,
41 Maia e laumaurisigira tania niqira totu rota igira ara kilia na sasanga,
42 Igira na tinoni e gotodou niqira sasaga ara reia e laba na omea vaga ia, me gini dou sosongo na tobaqira,
43 Igamu na tinoni amu sasaga, e dou kamu padatugutugugira na omea girani,