1 Iau sip ugu, Watong, no nugu dadas.
2 No Watong aie no nugu haatkis, no nugu subaan na munmun ma no nugu Ut na Harhalon.
3 Iau tataau uram tano Watong nong i takodas bia da pirlat ie,
4 Iau te wiwis taar um tano winwisaan na minaat.
5 No winwisaan tano midi ga wiwisane iau.
6 Tano nugu tapunuk iau ga tataau uram tano Watong.
7 No ula hanuo ga dedar, gaam kunakunar,
8 A mis ga tubuala suur ta ira matana ngarngarona.
9 I ga harbasiane no mawe ma gaam hansur.
10 I ga kawas hut ta ira kerubim ma gaam pupungo.
11 I ga gil no kankado bia uno hanuo na munmun, ma uno pupulus wara hakukuh bus ie
12 Meram tano pilpilakas tano uno matmataan, ira bahuto diet ga haan saakit
13 No Watong ga ianga parpar meram ra mawe.
14 I ga lapotane ira uno rumus ma gaam pasak harbasiane ira ebar.
15 Ira salil tano balana no tes ga hanuat puasa,
16 I ga sasangaha suur meram naliu ma gaam palim leh iau,
17 Ga halangalanga iau sukun no nugu dadas na ebar
18 Diet ga tur mamate iau tano bunguno no nugu halhaliarai
19 Ga kap hasur tar iau ukai tiga bilai na sibaan na harbalaurai.
20 No Watong i te balu iau haruat ma ira nugu takodasiana magingin.
21 Kanong warah, iau te mur ira ngaas tano Watong.
22 Ira uno harkurai bakut kanik menalua tagu.
23 Iau te mur ira bilai sen mon ra matmataan tana,
24 No Watong te balu iau haruat ma ira nugu takodasiana magingin.
25 Ta diet ing pai haruat bia da nurnur songa ta diet, nu haminas be augu at pai haruat bia da nurnur songa taam.
26 Ta diet ing diet gamgamatien, nu haminas ugu bia augu at u gamgamatien,
27 U la halhalon diet ira ut na kis matien,
28 Watong, u la halulungo tar at no nugu laam.
29 Ing nu harharahut iau, ni petlaar bia ni harsomane timaan tiga matana ubane.
30 Iesen ing ta God, ira uno ngaas i bilai harsakit.
31 Kanong warah, no Watong sen mon aie no God. Taie tiga mes.
32 Ne God at nong i la tartar dadas tagu,
33 I la gilgil ira kakigu hoing ira kakina dia.
34 I la tangtagure ira iruo limagu wara hinarubu,
35 U tar tagu no num bahbahit na papaas hasur ira ebar.
36 U la gilgil hatapegas no ngaas napu tagu,
37 Iau ga pasak mur ira nugu ebar ma iau gaam pasak soot diet.
38 Iau ga gisiane diet, kaik diet pa ga haruat be diet na tut hut.
39 U ga hapapalim iau ma ra dadas wara hinarubu.
40 U ga gil ira nugu ebar bia diet na tar tihi diet tagu, ma diet naga hilau,
41 Diet ga suah wara harharahut, iesen ga taie tikai wara halhalon diet.
42 Iau ga milau diet, diet gaam maririsuan hoing ra kaabus no dadaip i kap ie.
43 U te halangalanga iau sukun ira halhaliarai ta ira matanaiabar.
44 Ing at mon diet hadade iau, diet taram iau.
45 Diet bakut, i puko ira udiet nurnuruan,
46 No Watong i lon! A pirharlat tupas no nugu Haatkis!
47 Aie no God nong i la turtur wara utagu,
48 ma nong mah i la halhalon leh iau mekaia ta ira nugu ebar.
49 Io kaik, Watong, iau ni pirlat ugu nalamin ta ira hunhuntunaan ta ira mes na hanuo.
50 I te tar tano uno king no dadas wara papaas hasur ira ebar.